नेपालमाला
२२ आश्विन २०७७, बिहीबार 
काठमाडौं : कोरोना भाइरसको महामारीका कारण अहिले सिंगो विश्व आक्रान्त बनेको छ । यसको चपेटामा नेपाल पनि नराम्रोसँग फसेको छ । पछिल्लो समय कोरोना भाइरसको हट स्पट काठमाडौं उपत्यका पनि बनेको छ । यहाँ दिनहुँ सयौंको संख्यामा संक्रमित थपिरहेका छन् ।
सिंगो मुलुक र काठमाडौं उपत्यका कोरोना भाइरसले नराम्ररी आक्रान्त बनेका बेला नेपाल बक्सिङ संघका अध्यक्ष राम अवालेले भने राष्ट्रिय खेलकुद परिषद् (राखेप) को निर्देशन पटक पटक उल्लंघन गर्ने मात्र होइन, आर्थिक सहयोगका नाममा सिकिस्त बिरामीलाई दर्जनौं मानिसका भीडमा लगेर उनको स्वास्थ्यमाथि गम्भीर खेलबाड पनि गरेका छन् ।
नेपालमा कोरोना भाइरस देखा परेपछि राखेपले २०७६ फागुन २६ गते सबै खेलकुद संघका नामलाई परिपत्र गर्दै कुनै पनि खेलकुदका गतिविधि सञ्चालन नगर्न निर्देशन दिएको थियो । राखेपको यो निर्देशनको अधिकांश संघले अक्षरसः पालना गरिरहेका पनि छन् । तर, नेपाल बक्सिङ संघले भने त्यो निर्देशन पटक पटक उल्लंघन मात्र गरेको छैन, राखेपलाई नै चुनौती पनि दिँदै आएको छ । बक्सिङ संघले कोरोनाले आक्रान्त भएपछि गरिएको लकडाउनमै विभिन्न जिल्लाको अधिवेशन मात्र गरेन, संघको केन्द्रीय कार्यसमितिको बैठक समेत आयोजना गरेको थियो । निकै विवादित बनेको कार्यसमिति बैठक लकडाउनकै समयमा बोलाएको थियो । त्यसपछि पनि प्रशिक्षक र रेफ्री जर्जको कोरोना बीमाका नाममा होस् या राखेप पदाधिकारीको स्वागत र सम्मानका नाममा किन नहोस् सदैव सरकारी निर्देशनको धज्जी उडाउँदै आएको छ ।
बिहीबार पनि नेपाल बक्सिङ संघ खासगरी राम अवालेले यस्तै विवादास्पद् काम गरेर जग हसाइँ गरेका छन् । विगत एक महिनादेखि प्यारालाइसिसबाट थलिएका पूर्व बक्सर ओमप्रकाश शर्माको उपचारका लागि आर्थिक सहयोग गर्ने नाममा उनको स्वास्थ्यमाथि पनि गम्भीर खेलबाड गर्ने काम राम अवालेले गरेका छन् । पूर्व राष्ट्रिय च्याम्पियन शर्मा विगत लामो समयदेखि उच्च रक्तचापबाट पीडित थिए । उच्च रक्तचापले हान्दा उनको शरीरको बायाँ साइड नचल्ने भएको छ । उनी केही समय उभिन त सक्छन् तर, हिंडडुल गर्न सक्तैनन् । राम अवालेले आर्थिक सहयोग गर्ने बहनामा यस्तो सिकिस्त अवस्थामा रहेका शर्मालाई झुण्ड्याउँदै पार्टी प्यालेसमा लगिएको थियो । जहाँ दर्जनौं मानिस भेला भएका थिए । यस्ता गम्भीर प्रकृतिका बिरामीमा कोरोना भाइरस संक्रमणको जोखिम उच्च रहने जान्दाजाँदै राम अवालेले शर्माको स्वास्थ्यमा गम्भीर खेलवाड गरेका थिए ।
नेपाल बक्सिङ संघको चार वर्षे पदावधि सकिएको र विस्तारै चुनावी सरगर्मी पनि सुरु हुन लागेपछि राम अवालेले चुनावी हत्कण्डाकै रुपमा आर्थिक सहयोग कार्यक्रमलाई लिएको देखिन्छ । आफ्नो पक्षमा यति धेरै मानिस छन् भनेर देखाउन पनि दर्जनौं मानिस जम्मा पारेको बुझिएको छ । नेपाली खेलकुदका अघिल्लो पुस्ताका खेलाडीलाई सहयोग गर्नु सराहणीय हो । तर, सहयोग गर्दा बिरामीको स्वास्थ्यलाई पनि ख्याल गर्नुपर्ने जरुरी हुन्छ । राम अवाले र नेपाल बक्सिङ संघ यसमा नराम्रोसँग चुकेको छ ।
अर्को रोचक त राम अवालेमा संघ सञ्चालन गर्ने क्षमता भएन र उनी अरुको देखासिखी मात्रै गर्छन् भन्ने आरोपलाई पनि उनले सही सावित गरेका छन् । चार वर्षको अवधिमा सिन्कोसम्म नभाँचेका राम अवाले अरुले जे ग¥यो त्यसैको पछि लाग्दै आएका छन् भन्ने कुरा उनी आफैले बिहीबार प्रमाणित गरिदिए ।
पूर्व बक्सर शर्माको उपचारका लागि संघका केन्द्रीय सदस्य ओमनारायण श्रेष्ठले बुधबार मात्रै उनकै निवासमा पुगेर स्वास्थ्य उपचारका लागि ५० हजार रुपैयाँ हस्तान्तरण गरेका थिए । ओमनारायणले सहयोग गरेर ‘हाइलाइट’ भएपछि राम अवालेलाई रातभरि निद्रा लागेन र उनले बिहीबार आफ्ना नजिकका मानिस भेला पारेर पार्टी प्यालेसमा तामझामका साथ कार्यक्रम गरेका थिए । ओमनारायणले भने उच्च स्वास्थ्य सर्तकता अपनाउँदै एक्लै गएर शर्मालाई चेक हस्तान्तरण गरेका थिए ।
ओमनारायण श्रेष्ठले यसअघि १३औं दक्षिण एसियाली खेलकुद (साग) मा सहभागी १६ जना खेलाडीसँगै केही प्रशिक्षक र रेफ्री जर्जको कोरोना बीमा गर्दा पनि राम अवालेले होडबाजी गरेका थिए । उनले ओमनारायणसँग प्रतिस्पर्धा गर्दै प्रशिक्षक र रेफ्री जर्जको कोरोना बीमा गर्दा धेरैको बीमा दोहोरिएको थियो । कोरोना बीमा जति ठाउँमा गरे पनि एक ठाउँबाट मात्रै रकम पाइने प्रावधान छ । यो प्रावधान जान्दाजान्दै पनि राम अवालेले ओमनारायणसँग प्रतिस्पर्धा गर्दा करिब दुई दर्जन व्यक्तिको दुवैतिरबाट बीमा भएको थियो ।
नेपाली बक्सिङको विकास र विस्तारका साथै यसको श्रीवृत्तिमा लामो समयदेखि त्रियाशील ओमनारायण श्रेष्ठ नेपाल बक्सिङ संघको आसन्न निर्वाचनमा अध्यक्षका आकांक्षी बन्ने हल्ला चलेदेखि राम अवालेले उनीसँग झन तीब्र प्रतिस्पर्धा गर्दै आइरहेका छन् ।
यो पनि पढ्नुस्
