काठमाडौं : गत साउन १५ र १६ गते ललितपुरको गोदावरीमा बसेको नेपाल बक्सिङ संघको पूर्ण कार्यसमिति बैठकले पारित गरेका एकलौटी निर्णयहरु बदरको माग गर्दै राष्ट्रिय खेलकुद परिषद्मा उजुरी परेको छ । नेपाल बक्सिङ संघका महासचिव सविन भट्टचार्य र कोषाध्यक्ष गौतम सुजखुले आइतबार राष्ट्रिय खेलकुद परिषद्मा उजरी दर्ता गराएका हुन् ।
महासचिव र कोषाध्यक्षले परिषद्मा दिएको उजुरीमा लामो समयसम्म बैठक नबोलाई अध्यक्ष राम अवालेले एकलौटी रुपमा मनोमानी ढंगले विधान विपरीत संघ सञ्चालन गर्दै आइरहेको र विधानमा नै नभएको सहकोषाध्यक्ष पद सिर्जना गरी आर्थिक अनियमितता गरेको आरोप लगाइएको छ । ‘नेपाल बक्सिङ संघमा भएको आर्थिक अनियमितता एवं संघको विधान विपरीत भएको कार्यहरु जस्तैः आयव्यय सार्वजनिक नगर्नु, लेखा परीक्षण नगर्नु, परिषद्बाट प्राप्त अनुदान सहयोगको समयमै पेश्की फछ्योट नगर्नु तथा संघको विधानमा नै नभएको कार्यबहाक कोषाध्यक्ष पद सिर्जना गरी कोषाध्यक्ष गौतम सुजखुलाई थाहै नदिई सदस्य राम गिरीलाई कार्यबहाक कोषाध्यक्ष बनाई संघको सातदोबाटोस्थित सानिमा बैंकबाट लाखौं रुपैयाँ अपचलन गरेको उजुरी निवेदन राष्ट्रिय खेलकुद परिषद्मा दिँदासमेत कुनै कारवाही नभएपछि अध्यक्ष राम अवालेको गलत कार्य गर्ने मनोबल बढेको स्पष्ट छ । अर्कोतर्फ राष्ट्रिय खेलकुद परिषद्का जिम्मेवार विभागीय प्रमुखको प्रोत्साहनले समेत अवालेलाई आर्थिक अनियमितता गर्न सहयोग पुगिरहेको छ’, महासचिव र कोषाध्यक्षले आफ्नो उजुरीमा भनेका छन् ।
यसैगरी गत साउन १५ र १६ गते गोदावरीमा बसेको केन्द्रीय कार्यसमितिको बैठकमा निर्णयहरु एकलौटी रुपमा गर्न नहुने भन्दै पदाधिकारीहरुले असहमति जनाएपछि त्यो बैठक त्यत्तिकै स्थगित गरेकोमा अध्यक्ष राम अवालेले आफ्ना नजिकका केही व्यक्तिलाई अन्यत्रै लगेर नयाँ माइन्युट बनाएरमा एकलौटी निर्णय गरिएको भन्दै सो बदर गर्न पनि माग गरिएको छ ।
गत साउन १५ गते ललितपुरको गोदावरीमा बोलाइएको संघको केन्द्रीय कार्यसमिति बैठकमा आफ्नो असहमति पनि माइन्युटमा समावेश गर्न पाउनुपर्ने माग राख्दा संघका केन्द्रीय सदस्य र राष्ट्रिय खेलकुद परिषद्का सहायक प्रशिक्षक दीपक महर्जनले आफूमाथि अभद्र व्यवहार गरेको र त्यसमा अध्यक्ष राम अवालेको पनि मौन सहमति रहेको आरोप महासचिव भट्टाचार्यले लगाएका छन् । उनले गत शनिबार एक विज्ञप्ति प्रकाशित गर्दै त्यसको घोर भत्र्सना समेत गरेका थिए ।
दीपक महर्जनको शंकास्पद् भूमिका
बक्सिङ संघमा दीपक महर्जनको भूमिका शंकास्पद देखिएको छ । उनले राष्ट्रिय खेलकुद परिषद्को करारको सहायक प्रशिक्षकको जागिर जोगाउन संघको बैठकको निर्णय पुस्तिका (माइन्युट) मा हस्ताक्षर गरेका छैनन् । माइन्युटमा हस्ताक्षर नगरे पनि उनले केन्द्रीय सदस्यकै हैसियतमा बैठकमा आफ्नो कुरा राखेका थिए । महासचिवले आफ्नो असहमति माइन्युटमा समावेश गर्न पाउनुपर्छ भनेपछि दीपक महर्जन झोक्किँदै माइन्युटमा निर्णय बेगर अरु कुनै कुरा लेख्न नपाइने भन्दै महासचिवमाथि खनिएको संघका एक सदस्यले जानकारी दिए ।
राष्ट्रिय खेलकुद परिषद्का करारका सहायक बक्सिङ प्रशिक्षक दीपक महर्जनले खेलकुद विकास ऐन २०७७ ले व्यवस्था गरेको कानुनी व्यवस्था अनुरुप नेपाल बक्सिङ संघको केन्द्रीय सदस्य अथवा सहायक प्रशिक्षक पदबाट राजीनामा दिनुपर्ने हुन्छ । तर, उनले अटेरी गर्दै अहिलेसम्म राजीनामा नदिई अध्यक्ष राम अवालेको रक्षाकवज भएर बसिरहेका छन् ।
खेलकुद विकास ऐन अनुसार यसरी अटेर गरेमा अटेर गर्ने व्यक्ति र संघ दुवै अवैधानिक ठहर हुने व्यवस्था छ । खेलकुद ऐन लागु हुनासाथ राष्ट्रिय खेलकुद परिषद्का सदस्यसचिवलगायत सबै पदाधिकारी पदमुक्त भएका थिए । परिषद्को सिंगो बोर्ड खाली भएपछि नयाँ ऐन अनुसार पुनः नियुक्ति गरिएको थियो । परिषद्को सिंगो बोर्ड हटेर नयाँ आइसक्दा पनि दीपक महर्जन प्रशिक्षक र केन्द्रीय सदस्यमा सक्रिय हुनुलाई रहस्यका रुपमा हेरिएको छ । उनले अहिलेसम्म दुवै पद नछाडेको भन्दै परिषद्मा उजुरी पनि परिरहेको छ । तर, परिषद्ले पनि उजुरीउपर कारवाही प्रक्रिया नथाल्नु शंकास्पद देखिएको छ ।
दीपक महर्जन सन् २०१० को गोन्जाउ एसियाली खेलकुदका एक्ला कांस्य पदक विजेता हुन् । सोही आधारमा उनले राष्ट्रिय खेलकुद परिषद्मा करारमा सहायक प्रशिक्षकको नियुक्ति पाएका थिए । परिषद्मा जागिरे सुरु गरेसँगै उनी नेपाल बक्सिङ संघमा पनि सक्रिय भए । उनी काठमाडौं जिल्ला बक्सिङ संघको उपाध्यक्ष बने । त्यसपछि संघको केन्द्रीय सदस्यमा मनोनित भए । गत माघ १७ मा विवादित रुपमा गठन गरिएको काठमाडौं जिल्ला बक्सिङ संघको पनि उनी उपाध्यक्ष छन् । नयाँ ऐन अनुसार परिषद्को जागिरबाट राजीनामा दिएमा उनी केन्द्र र जिल्ला दुवै ठाउँमा बस्न पाउँछन् । परिषद्को सहायक प्रशिक्षक नै रोज्ने हो भने केन्द्रीय र जिल्ला संघको पदाधिकारीबाट राजीनामा दिनुपर्ने हुन्छ ।
काठमाडौं जिल्ला संघका अध्यक्ष दिनकलाल श्रेष्ठले आफूलाई थाहै नदिई जिल्ला संघ पुनर्गठन गरिन लागेको भन्दै राष्ट्रिय खेलकुद परिषद् र काठमाडौं जिल्ला खेलकुद विकास समितिमा निवेदन दिएका थिए । त्यसपछि परिषद्ले पनि पुनर्गठन नगर्न परिपत्र गरे पनि एकलौटी रुपमा काठमाडौं जिल्ला बक्सिङ संघ पुनर्गठन गरिएको थियो ।