युरोकप फुटबल : प्रिक्वार्टर समीकरण पूरा

बुडापेस्ट : १६औं संस्करणको युरोकप फुटबलको प्रिक्वार्टरफाइनलको समीकरण पूरा भएको छ । बुधबार राति भएको खेलमा ‘ग्रुप अफ डेथ’ मानिएको समूह ‘एफ’बाट फ्रान्स, जर्मनी र पोर्चुगलले अन्तिम १६ मा स्थान बनाएपछि प्रिक्वार्टरफाइनलको समीकरण पूरा भएको हो ।
क्वार्टरफाइनल प्रवेशका लागि अब वेल्स र डेनमार्क, इटाली र अस्ट्रिया, नेदरल्यान्ड्स र चेक रिपब्लिक, बेल्जियम र पोर्चुगल, क्रोएसिया र स्पेन, फ्रान्स र स्विट्जरल्यान्ड, इङ्ल्यान्ड र जर्मनी एवं स्विडेन र युक्रेनबीच प्रतिस्पर्धा हुनेछ । प्रिक्वार्टरफाइनलका खेल शनिबारबाट सुरु हुनेछ ।

फ्रान्स, जर्मनी र पोर्चुगल नकआउट चरणमा
युरोकप फुटबलअन्तर्गत समूह ‘एफ’बाट विश्व विजेता फ्रान्स, जर्मनी र साविक विजेता पोर्चुगलले अन्तिम १६ मा स्थान बनाएका छन् । हंगेरीको बुडापेस्टमा बुधबार राति भएको खेलमा पोर्चुगलसँग २–२ गोलको बराबरी खेल्दै फ्रान्स समूह विजेता बन्यो । हंगेरीको पुस्कास एरिनामा फ्रान्सका लागि करिम बेन्जमाले दुई गोल गरे । पोर्चुगलका क्रिस्टियानो रोनाल्डोले पनि दुवै गोल गरेका थिए ।
निकै प्रतिस्पर्धात्मक खेलको ३१औं मिनेटमा कप्तान रोनाल्डोले पेनाल्टीमा गोल गर्दै पोर्चुगललाई सुरुवाती अग्रता दिलाएका थिए । फ्रान्सका गोलरक्षक ह्युगो लोरिसले पेनाल्टी क्षेत्रमा डानिल पेरेरालाई फल गरेपछि पोर्चुगलले पेनाल्टी पाएको थियो । जसलाई रोनाल्डोले सदुपयोग गरेका थिए ।
पहिलो हाफको इन्जुरी समयमा फ्रान्सका बेन्जमाले पेनाल्टीमा गोल गर्दै १–१ गोलको बराबरी गरेका थिए । पोर्चुगलका नेल्सन सेमिडोले केइलिन एमबाप्पेलाई पेनाल्टी क्षेत्रभित्र लडाएपछि फ्रान्सले पेनाल्टी पाएको थियोे । बेन्जमाले फ्रान्सका लागि करिब ६ वर्षपछि राष्ट्रिय टोलीबाट गोल गरेका हुन् । पछिल्लो पटक उनले फ्रान्सका लागि २०१५ को अक्टोबर ८ मा गोल गरेका थिए । दोस्रो हाफको सुरुवातमै फ्रान्सले अग्रता बनाएको थियो । पल पोग्बाको पासमा बेन्जमाले ४७औं मिनेटमा व्यक्तिगत दोस्रो गोल गर्दै फ्रान्सलाई २–१ को अग्रता दिलाए । सुरुमा सहायक रेफ्रीले अफसाइड दिए पनि भीएआरको मद्दतमा गोलले मान्यता पाएको थियो । ६०औं मिनेटमा रोनाल्डोले पेनाल्टीमै व्यक्तिगत दोस्रो गोल गर्दै पोर्चुगललाई २–२ गोलको बराबरीमा ल्याएका थिए । फ्रान्सका जुलेसले ह्यान्डबल गरेपछि पाएको पेनाल्टीमा रोनाल्डोले गोल गरेका थिए ।
यससँगै रोनाल्डोले पोर्चुगलका लागि एक सय नवौं अन्तर्राष्ट्रिय गोल पूरा गरेका छन् । उनले सर्वाधिक अन्तर्राष्ट्रिय गोल गर्ने इरानका अलि देईको कीर्तिमानसँग बराबरी समेत गरेका छन् । यस्तै रोनाल्डोले जर्मनीका मिगोस्लाभ क्लोजको कीर्तिमानसमेत भंग गरेका छन् ।

रोनाल्डोले क्लोजको नाममा रहेको दुई ठूला प्रतियोगिता विश्वकप र युरोकपमा सर्वाधिक धेरै गोल गर्ने खेलाडीको कीर्तिमान भंग गरेका हुन् । फ्रान्सविरुद्धको दुई गोल गरेसँगै रोनाल्डोले विश्वकप र युरोपकमा २१औं गोल पूरा गरेका छन् । ३६ वर्षीय रोनाल्डोले युरोकपमा १४ र विश्वकपमा सात गोल गरेका छन् । यस अघि विश्वकप र युरोकपमा क्लोजले १९ गोल गर्दै कीर्तिमान बनाएका थिए । जारी प्रतियोगितामा रोनाल्डोको यो पाँचौ गोल हो । रोनाल्डो युरोकपमा सर्वाधिक गोल गर्ने खेलाडीमा शीर्ष स्थानमा छन् ।
पोर्चुगलसँग बराबरी खेलेपछि समूह ‘एफ’ मा रहेको फ्रान्सले तीन खेलमा पाँच अंक जोड्यो । अपराजित फ्रान्सले शीर्ष स्थानमा रहँदै अन्तिम १६ मा स्थान पक्का ग¥यो । यसअघि समूह चरणको पहिलो खेलमा फ्रान्सले जर्मनीलाई १–० गोलले पराजित गरेको थियो । दोस्रो खेलमा फ्रान्स र हंगेरीले १–१ गोलको बराबरी खेलेका थिए ।
फ्रान्ससँगको बराबरीसँगै पोर्चुगलले तीन खेलमा चार अंक जोड्यो । पोर्चुगल समूहको तेस्रो स्थानमा रह्यो । पोर्चुगल समूहको उत्कृष्ट तेस्रो टिम बन्दै नकआउट चरणमा पुगेको हो । समूह चरणको पहिलो खेलमा पोर्चुगलले हंगेरीलाई ३–० गोलले पराजित गरेको थियो । दोस्रो खेलमा पोर्चुगल जर्मनीसँग ४–२ गोलले पराजित भएको थियो ।
यस समूहमा जर्मनी दोस्रो स्थानमा रहँदै अन्तिम १६ मा स्थान बनायो । बुधबार राति भएको खेलमा हंगेरीसँग २–२ गोलको बराबरी खेल्दै जर्मनीले अन्तिम १६ मा स्थान बनाएको हो । पोर्चुगलसँग बराबरी अंक भए पनि जर्मनीले हेड टु हेडमा दोस्रो स्थान कब्जा गरेको हो । जर्मनीले तीन खेलमा चार अंक नै जोडेको थियो ।
प्रतिस्पर्धात्मक खेलमा सुरुवाती अग्रता भने हंगेरीले बनाएको थियो । खेलको ११औं मिनेटमा कप्तान एडम सजलाइले गोल गर्दै हंगेरीलाई सुरुवाती अग्रता दिलाएका थिए । उनले रोलान्डको पासमा उत्कृष्ट हेड गोल गरेका थिए । खेलको ६६औं मिनेटमा काइ हाभर्टेजले गोल गर्दै जर्मनीलाई खेलमा फर्काएका थिए । उनले माट्स हुमेल्सको पासमा गोल गरेका थिए ।
त्यसलगत्तै ६८औं मिनेटमा आन्द्रेस सेफरले गोल गर्दै हंगेरीलाई २–१ को अग्रता दिलाए । ८४औं मिनेटमा लियोन गोरेट्जकाले गोल गर्दै जर्मनीलाई हारबाट जोगाएका थिए । यस अघि समूह चरणको पहिलो खेलमा फ्रान्ससँग १–० ले पराजित जर्मनीले दोस्रो खेलमा पोर्चुगललाई ४–२ गोलले पराजित गरेको थियो । जर्मनीसँग २–२ गोलको बराबरी खेले पनि हंगेरी समूह चरणबाट बाहिरिएको छ । हंगेरीले तीन खेलमा दुई अंक मात्र जोड्न सक्यो । पहिलो खेलमा पोर्चुगलसँग ३–० ले पराजित हंगेरीले दोस्रो खेलमा फ्रान्ससँग १–१ गोलको बराबरी खेलेको थियो ।