न्युजिल्यान्ड च्याम्पियन

लन्डन : न्युजिल्यान्डले आईसीसी विश्व टेस्ट च्याम्पियनसिपको उपाधि जितेको छ । छैटौं दिनसम्म चलेको प्रतियोगिताको फाइनलमा भारतलाई आठ विकेटले पराजित गर्दै न्युजिल्यान्डले उपाधि जितेको हो ।
साउथह्याम्पटनमा बुधबार दोस्रो पालिमा भारत एक सय ७० रनमा समेटिएपछि न्युजिल्यान्डले एक सय ३९ रनको लक्ष्य पाएको थियो । उक्त लक्ष्य न्युजिल्यान्डले दुई विकेट गुमाएर पूरा ग¥यो । दोस्रो पालिमा न्युजिल्यान्डका कप्तान केन विलियम्सनले ५२ रन बनाए । यसैगरी रस टेलर ४७ रनमा अविजित रहे । न्युजिल्यान्डका ओपनर डेभोन कन्वे १९ र टम लाथम नौ रनमा पेभेलियन फर्किए । भारतका रविचन्द्रन अश्विनले दुई विकेट लिए ।
दोस्रो पालिमा भारतका ऋषव पन्तले सर्वाधिक ४१ रन बनाए । रोहित शर्माले ३० रन जोड्दा रवीन्द्र जडेजाले १६ रनको योगदान दिए । न्युजिल्यान्डका टिम साउथीले चार विकेट लिए । ट्रेन्ट बोल्टले तीन तथा काइल जेमिसनले दुई विकेट हात पारे ।
यसअघि टस हारेर पहिले ब्याटिङ गरेको भारतले पहिलो पालिमा दुई सय १७ रन बनाएको थियो । पहिलो पालिमा भारतका अजिन्क्या रहाणेले सर्वाधिक ४९ रन बनाएका थिए । यस्तै कप्तान विराट कोहलीले ४४ रन जोड्दा रोहित शर्माले ३४ रन बनाए । भारतलाई सस्तैमा समेट्न न्युजिल्यान्डका काइल जेमिसनले पाँच विकेट लिए । यस्तै ट्रेन्ट बोल्ट र निल वाग्नरले दुई÷दुई विकेट हात पारेका थिए ।
पहिलो पालिमा न्युजिल्यान्ड पनि दुई सय ४९ रनमा अलआउट भएको थियो । न्युजिल्यान्डका डेभोन कन्वेले ५४ रनको अर्धशतकीय पालि खेलेका थिए । कप्तान केन विलियम्सनले ४९ रन जोडे । भारतका मोहमद सामीले चार विकेट लिएका थिए । इशान शर्माले तीन तथा रविचन्द्रन अश्विनले दुई विकेट लिए ।
उपाधिसँगै न्युजिल्यान्डले १६ लाख अमेरिकी डलर पुरस्कार प्राप्त ग¥यो । उपविजेता बनेको भारतले आठ लाख अमेरिकी डलरमा चित्त बुझायो । वर्षाले बिथोलेपछि खेल छैटौं दिनसम्म लम्बिएको थियो । अन्तर्राष्ट्रिय क्रिकेट परिषद् (आईसीसी) ले एक दिन ‘रिजर्भ डे’ राखेको थियो ।