रोनाल्डोको कीर्तिमान

बुडापेस्ट : पोर्चुगलका कप्तान क्रिस्टियानो रोनाल्डोले अन्तर्राष्ट्रिय प्रतियोगितामा सर्वाधिक गोल गर्ने खेलाडीको कीर्तिमानसँग बराबरी गरेका छन् । रोनाल्डोले इरानका पूर्वस्टार अली देईको नाममा रहेको एक सय नवौं अन्तर्राष्ट्रिय गोलको कीर्तिमानसँग बराबरी गरेका हुन् ।
समूह चरणको अन्तिम खेलमा फ्रान्सविरुद्ध पेनाल्टीमा दुई गोल गर्दै रोनाल्डोले अली देईको कीर्तिमानसँग बराबरी गरेका हुन् । ३६ वर्षीय रोनाल्डोले एक सय ७८ खेलमा एक सय नौ गोल गरेका हुन् । इरानी देईले सन् १९९३ देखि २००६ को समयमा सर्वाधिक गोल गर्ने खेलाडीको कीर्तिमान बनाएका थिए । बेल्जियमविरुद्धको अन्तिम १६ को खेलमा गोल गर्न सकेमा उनी सर्वाधिक गोल गर्ने खेलाडी बन्ने छन् ।
यसैगरी रोनाल्डोले जर्मनीका मिगोस्लाभ क्लोजको कीर्तिमानसमेत भंग गरेका छन् । रोनाल्डोले क्लोजको नाममा रहेको दुई ठूला प्रतियोगिता विश्वकप र युरोकपमा सर्वाधिक धेरै गोल गर्ने खेलाडीको कीर्तिमान भंग गरेका हुन् । फ्रान्सविरुद्ध दुई गोल गरेसँगै रोनाल्डोले विश्वकप र युरोपकमा २१औं गोल पूरा गरेका छन् । रोनाल्डोले युरोकपमा १४ र विश्वकपमा सात गोल गरेका छन् । यस अघि विश्वकप र युरोकपमा क्लोजले १९ गोल गर्दै कीर्तिमान बनाएका थिए । जारी प्रतियोगितामा रोनाल्डोको यो पाँचौ गोल हो । रोनाल्डो युरोकपमा सर्वाधिक गोल गर्ने खेलाडीमा शीर्ष स्थानमा छन् ।
साविक विजेता पोर्चुगलका कप्तान क्रिस्टियानो रोनाल्डो युरोकपको पहिलो खेल खेल्दा नै केही कीर्तिमान पनि बनाएका थिए । युभेन्ट्सबाट व्यावसायिक फुटबल खेल्ने रोनाल्डो युरोपियन च्याम्पियनसिप (युरोकप) मा लगातार पाँच संस्करण खेल्ने पहिलो खेलाडी बनेका छन् । यसअघि उनले सन् २००४ देखि २०१६ सम्म लगातार चार संस्करण खेलेका थिए । रोनाल्डोले पहिलो पटक सन् २००४ मा घरेलु मैदानमै भएको युरोकप खेलेका थिए । त्यसमा पोर्चुगल फाइनलमा पराजित गएको थियो । २०१६ मा रोनाल्डोकै कप्तानीमा पोर्चुगलले फ्रान्सलाई पराजित गर्दै पहिलो पटक उपाधि जितेको थियो ।
यसैगरी रोनाल्डोले आफूले खेलेका पाँचै संस्करणमा गोल पनि गरेका छन् । रोनाल्डोले युरोकपको डेब्यु खेलमा दुई गोल गरेका थिए । यस्तै सन् २००८ मा एक, सन् २०१२ मा तीन र सन् २०१६ मा पनि तीन गोल गरेका थिए । जारी प्रतियोगितामा उनले पाँच गोल गरिसकेका छन् । पछिल्लो ४५ खेलमा उनले ४८ गोल गरिसकेका छन् ।