रोहितको कप्तानी पालिमा नेपालको जित

काठमाडौं : रोहितकुमार पौडेलको कप्तानी पालिमा नेपालले बलियो टोली वेस्ट इन्डिजको ‘ए’ टोलीलाई पराजित गरेको छ । कीर्तिपुरस्थित त्रिवि क्रिकेट मैदानमा शनिबार भएको पहिलो टीट्वेन्टी खेलमा वेस्ट इन्डिजलाई चार विकेटले पराजित गरेको हो ।
वेस्ट इन्डिजले दिएको दुई सय पाँच रनको विशाल लक्ष्य नेपालले दुई बल बाँकी छँदै ६ विकेट गुमाएर पूरा गरेको थियो । नेपाललाई प्रभावशाली जित दिलाउन कप्तान रोहितले एक सय १२ रनको शतकीय पालि खेलेका थिए । तेस्रो नम्बरमा ब्याटिङमा उत्रिएका रोहितले ५४ बलमा ६ छक्का र १० चौका प्रहार गरे । टीट्वेन्टी क्रिकेटमा रोहितको पहिलो शतक हो । यसैगरी दीपेन्द्रसिंह ऐरीले २४ रन बनाउँदा कुशल मल्ल र कुशल भुर्तेलले समान १६ रनको योगदान दिए । वेस्ट इन्डिजका म्याथु फोर्ड र ओबेड म्याक्वेले दुई÷दुई तथा किमो पाउलले एक विकेट लिए ।
यसअघि टस हारेर पहिले ब्याटिङको निम्तो पाएको वेस्ट इन्डिजले निर्धारित २० ओभरमा पाँच विकेट गुमाउँदै दुई सय चार रनको योगफल तयार पारेको थियो । वेस्ट इन्डिजका कप्तान रोस्टन चेजले अर्धशतकीय पालि खेलेका थिए । उनले ४६ बलमा दुई छक्का र नौ चौकाको सहयोगमा ७४ रनको योगदान दिए । यस्तै एलिक अथनासियसले ४७, किसी कार्टीले ३८, कदिम अल्लेनेले १४ र आन्द्रे फ्लेचरले १३ रन बनाए । नेपालका कमलसिंह ऐरी, कप्तान रोहितकुमार पौडेल, अभिनाश बोहरा र दीपेन्द्रसिंह ऐरीले एक÷एक विकेट लिए ।
आगामी जुन २ बाट सुरु हुने आईसीसी टीट्वेन्टी विश्वकपको तयारीका लागि नेपालले इन्डिजसँग शृंखला खेलेको हो । पाँच खेलको शृंखलाको दोस्रो खेल आइतबार हुनेछ । यस्तै तेस्रो खेल बुधबार, चौथो बिहीबार र अन्तिम खेल आगामी शनिबार हुनेछ ।