नेपालमाला
१० असार २०७८, शुक्रबार 
काठमाडौं : जुडो खेलाडी सोनिया भट्टले जापानमा आयोजना हुने टोकियो ओलम्पिक खेल्ने भएकी छिन् । दुई वर्षअघि नेपालमा आयोजना भएको १३औं दक्षिण एसियाली खेलकुद (साग) की कांस्य पदक विजेता सोनियाले टोकियो ओलम्पिकको वाइल्ड कार्ड पाएकी हुन् । उनले १३औं सागमा महिला ४८ केजीमुनि कांस्य पदक जितेकी थिइन् ।
नेपाल जुडो संघका अध्यक्ष दीपकहर्ष बज्राचार्यले सोनियाले ओलम्पिक खेल्ने पक्का भएको जानकारी दिए । ‘सोनियाले ओलम्पिक खेल्ने पक्का भएको छ । हामीले इन्द्रबहादुर श्रेष्ठ र सोनियाको नाम पठाएकोमा सोनियाले वाइल्ड कार्ड पाएकी छन्’, अध्यक्ष वज्राचार्यले भने ।
जुनियर समूहमा अन्तर्राष्ट्रिय वरीयता र प्रदर्शन राम्रो भएका कारण सोनियाले वाइल्ड कार्ड पाएको नेपाल जुडो संघका महासचिव धर्मकुमार श्रेष्ठले जानकारी दिए । सोनिया विश्व जुडो च्याम्पियनसिपमा एक बाउट जित्ने पहिलो नेपाली खेलाडी पनि हुन् । सन् २०१९ मा मोरक्कोमा भएको वल्र्ड जुनियर च्याम्पियनसिपमा सोनियाले ४८ केजीमुनि तौलसमूहमा मोजाम्बिककी खेलाडीलाई पराजित गरेकी थिइन् । त्यसअघि कुनै पनि नेपाली खेलाडीले विश्वस्तरीय प्रतियोगितामा पहिलो खेल जित्न सकेका थिएनन् । त्यसअघि सोनियाले सन् २०१८ मा बेरुतमा भएको एसियन च्याम्पियनसिप र सन् २०१८ मै हङकङमा भएको एसियन कप क्याडेट एन्ड जुनियर च्याम्पियनसिपमा एक बाउट जितेकी थिइन् । सन् २०१८ मै अर्जेन्टिनामा आयोजना भएको युथ ओलम्पिक खेलकुदमा सहभागी भएकी सोनियाले सन् २०१९ मा जापानमा जुडोको विशेष प्रशिक्षण पनि लिएकी थिइन् ।
नेपाल पुलिस क्लबकी खेलाडी सोनियाले अहिले क्लबमै तयारी गरिरहेकी छन् । अब केही दिनपछि नै बन्द प्रशिक्षणमा राखेर तयारी थालिने अध्यक्ष वज्राचार्यले जानकारी दिए । सोनियाले घरेलु प्रतियोगितामा भने लगातार रुपमा स्वर्ण पदक जित्दै आइरहेकी छन् । उनले सातौं तथा आठौं राष्ट्रिय खेलकुद प्रतियोगितामा स्वर्ण जितेकी थिइन् ।
सोनिया टोकियो ओलम्पिकका लागि छनोट हुने पाँचौं नेपाली खेलाडी बनेकी छन् । यसअघि सुटिङकी कल्पना परियार, पौडीका गौरिका सिंह र एलेक्स शाह एवं एथलेटिक्सका गोपीचन्द्र पार्कीले टोकियो ओलम्पिक खेल्ने पक्का भइसकेको छ । यसैगरी पारा ओलम्पिकतर्फ भने तेक्वान्दो खेलाडी पलेसा गोवद्र्धनले वाइल्ड कार्ड पाएकी छन् ।
टोकियो ओलम्पिक जुलाई २३ देखि अगस्ट ८ सम्म आयोजना हुँदैछ । टोकियो ओलम्पिकमा ३३ खेलमा प्रतिस्पर्धा हुनेछ । जसमा कुल तीन सय ३९ पदकका लागि खेलाडीले प्रतिस्पर्धा गर्ने छन् ।
