च्यासललाई हिमालयनको धक्का

Bसहिद स्मारक ए डिभिजन लिगमा च्यासल युथ क्लबलाई हिमालयन शेर्पा क्लबको नमिठो धक्का लागेको छ ।

सातदोबाटोस्थित एन्फा मैदानमा भएको खेलमा हिमालयन शेर्पा क्लबले च्यासल युथ क्लबमाथि ३–२ गोलको रोमाञ्चक जित निकालेको छ । शेर्पासँगको हारले शीर्ष ६ मा रहने योजना बनाएको च्यासललाई नराम्रो धक्का लागेको छ ।

यस जितले हिमालयन शेर्पाको रेलिगेसन खतरा भने टरेको छ । शेर्पाको जितमा विजय गुरुङले २८औं र ५०औं मिनेटमा दुई गोल गरे । त्रिदेव गुरुङले ३३औं मिनेटमा एक गोल गरेका थिए ।

च्यासलका हायातु वाकिनोले ३७औं र ८९औं मिनेटमा दुई गोल गरेका थिए । शेर्पाका युरिच सिवे म्यान अफ दी म्याच भए । जितसँगै ११ खेलबाट १० अंक बनाएको शेर्पा ११औं स्थानमा उक्लिएको छ । १२ अंक बनाएको च्यासल १०औं स्थानमा छ ।

यसैगरी जाउलाखेल युथ क्लब लिगको पाँचौं स्थानमा उक्लिएको छ । सातदोबाटोस्थित एन्फा कम्प्लेक्स मैदानमा शनिबार भएको ललितपुर डर्वी भिडन्तमा जाउलाखेलले फ्रेन्ड्स क्लबलाई १–० गोलले हरायो । जाउलाखेलको जितमा फोडे फोफानाले निर्णायक गोल गरे ।

फोडेले ५८औं मिनेटमा गरेको गोल जाउलाखेलका लागि पर्याप्त बन्यो । १० खेलाडीमा समेटिएको फ्रेन्ड्सले राम्रो प्रदर्शन गर्न सकेन ।
फ्रेन्ड्सका साउल डी अक्विनो ६२औं मिनेटमा रातो कार्ड पाउँदै बाहिरिएका थिए । जाउलाखेलका खेलाडीलाई अनावश्यक फल हानेपछि रेफ्रीले साउललाई सोझै रातो कार्ड देखाएका थिए । त्यसपछि थप कमजोर देखिएको फ्रेन्ड्सले गोल गर्नलायक अवसर बनाउन सकेन ।

जाउलाखेलले पनि कमजोर फ्रेन्ड्समाथि थप फाइदा निकाल्न सकेन । जाउलाखेलका फोडे म्यान अफ दी म्याच भए । जितसँगै जाउलाखेलले ११ खेलबाट १८ अंक बनाएको छ । १४ अंक बनाएको फ्रेन्ड्स नवौं स्थानमा छ ।

0 0 vote
Article Rating

LEAVE A COMMENT

guest
0 Comments
Inline Feedbacks
View all comments