नेपालमाला
१७ फाल्गुन २०८०, बिहीबार 
काठमाडौं : नेपालकी चर्चित स्ट्राइकर सावित्रा भण्डारीले दशेका लागि खेल्नु आफ्ना लागि संधै महत्वपूर्ण हुने बताएकी छन् । वाफ फुटबल च्याम्पियनसिपअन्तर्गत जोर्डनसँगको फाइनल खेल गुमाएकी सावित्राले नेपालको जर्सी लगाएर मैदान ओलिँदा हरेक खेल अन्तिम खेल जसरी खेलेको बताइन् । उनले बिहीबार सामाजिक सञ्जालमा लामो स्टाटस लेख्दै देशका लागि खेल्नु आफ्ना लागि महत्वपूर्ण भए पनि व्यवसायिक करियरका लागि जोर्डनसँगको फाइनल खेल गुमाउनु परेको बताइन् ।
वाफ च्याम्पियनसिपमा नेपालले आज राति पाँच पटकको विजेता जोर्डनको सामना गर्दैछ । सेमिफाइनलमा लेवनानलाई २–१ गोलले पाखा लगाउँदै नेपालले फाइनलमा स्थान बनाएको हो । च्याम्पियनसिपकै सर्वाधिक गोलकर्ता सावित्रा अनुपस्थित भएपछि नेपाल दबाबमा छ । सावित्राले आफ्नो अनुपस्थितिमा पनि टोलीले उच्च प्रदर्शन गर्दै उपाधि जितोस् भन्दै शुभकामना पनि दिएकी छन् ।
फाइनल खेल फिफा विन्डोमा नपरेका कारण सावित्राले अनुपस्थित हुने भएकी हुन्। फिफाको नियम अनुसार विन्डोमा रहेको राष्ट्रिय टोलीको खेलमा मात्र खेलाडीले अनिवार्य उपस्थिति जनाउनुपर्ने नियम छ। वाफ च्याम्पियनसिपको समूह चरणको खेल फिफा विन्डोमा रहे पनि नकआउट चरणका खेल भने विन्डो बाहिर थिए। फ्रान्सेली क्लब एन अभान्ट ग्वेंगाम्पमा अनुबन्धित सावित्रालाई क्लबले सेमिफाइनलसम्म खेल्न दिएको थियो।
फ्रान्सेली लिगअन्तर्गत मार्च २ मा हुने खेल ग्वेंगाम्पका लागि निकै महत्वपूर्ण मानिएको छ। रेलिगेसन क्षेत्रमा रहेको लिल र ग्वेंगाम्पबीच चार अंकको मात्रै फरक रहेकाले क्लबका लागि महत्वपूर्ण मानिएको हो। रेलिगेसनबाट बच्न यो खेल जित्नै पर्ने भएकाले ग्वेंगाम्पले सावित्रालाई बोलाएको हो।
यस्तो छ सावित्राको स्टाटस
देशको लागि खेल्नु मेरो लागि आजपनि उत्तिकै महत्त्वपूर्ण छ, जति मैले गाउँ छोडेर सहर पस्दा त्यो जर्सी लगाउने सपना साँचेको थिएँ । नेपालको जर्सी लगाएर मैदानमा बिताएको हरेक सेकेन्ड मैले आफ्नो अन्तिम खेल जसरी खेलेको छु । नेपालको प्रतिनिधित्व गर्नुभन्दा ठूलो गौरवको कुरा सायदै अरु होला ।
वाफ महिला च्याम्पियनसिपमा हामी फाइनल खेल्दैछौं, तर एक फुटबल खेलाडी भएपछि मैले आफ्नो व्यावसायिक करिअर र सम्झौतालाई पनि उत्तिकै सम्मान गर्नुपर्छ । क्लबले सधैं मेरो लागि सहज वातवरण सिर्जना गरिदिएको छ, र यसपटक पनि फिफाले तोकेको भन्दा बढी समय राष्ट्रिय टोलीमा रहने व्यवस्था मिलाएकोमा धन्यवाद भन्न चाहन्छु ।
मलाई विश्वास छ हाम्रो टोलीले फाइनलमा पनि आफ्नो लय कायम राख्दै उपाधि घर लिएर जानेछ । हामीले एक टिमको रुपमा उच्च प्रदर्शन गरेर फाइनल यात्रा तय गरेका हौं । प्रतिद्वन्द्वी कठिन भएपनि हामी पुन: एकपटक एकजुट भएर जित हासिल गर्नेछौं भन्ने विश्वास मैले राखेको छु ।
खेलाडीको रुपमा मैदानमा नभएपनि म मैदानबाहिर आफ्नो देशको समर्थनमा हुनेछु । र जसरी टिमको गोलमा मैदानभित्र खुसी साट्थें, त्यसैगरी टोलीको गोलमा खुसी मनाउन आतुर छु ।
शुभकामना टिम!
हामी सक्छौं, हामी गर्छौं!
