इङ्ल्यान्डको प्रभावशाली जित

दोहा : इङ्ल्यान्डले फिफा विश्वकप २०२२ को आफ्नो पहिलो खेलमा प्रभावशाली जित निकालेको छ । दोहास्थित खलिफा अन्तर्राष्ट्रिय रंगशालामा सोमबार साँझ भएको खेलमा बुकायो साकाको दुई गोल प्रेरित इङ्ल्यान्डले इरानलाई ६–२ गोलले पराजित गरेको हो । समूह ‘बी’ को पहिलो खेलमा एसियन प्रतिद्वन्द्वीविरुद्ध गारेथ साउथगेटको इङ्ल्यान्डका पाँच फरक खेलाडीले गोल गरेका थिए ।
विश्वकपमा पहिलो पटक युरोपेली मुलुकलाई हराउने लक्ष्यसहित मैदानमा उत्रिएको इरान सन् १९६६ को विश्व विजेता इङ्ल्यान्डसँग निरीह बन्नपुगेको थियो । युरोपेली मुलुकविरुद्ध विश्वकपमा खेलेका आठमध्ये ६ खेलमा पराजय भोगेको इरानले दुई खेलमा बराबरीको नतिजा निकालेको छ ।
निरन्तर आक्रमणका मौका बनाएको इङ्ल्यान्डका लागि ३५औं मिनेटमा जुड बेलिङ्घमले गोल गर्दै सुरुवाती अग्रता दिलाएका थिए । विश्वकपमा डेब्यू गरेका बेलिङ्घमले हेडमार्फत उत्कृष्ट गोल गरेका थिए । त्यसको आठ मिनेट नबित्दै डिफेन्डर हेरी मग्वायरले दिएको पासमा साकाले गोल गरेका थिए । पहिलो हाफको अन्त्यमा सम्हालिन नसकेको इरानी रक्षापंक्तिलाई बिट गर्दै रहिम स्टर्लिङले तेस्रो गोल गरेका थिए । कप्तान हेरी केनको क्रसमा ६ यार्ड बक्स अगाडि अनमार्क रहेका स्टर्लिङले एक्रोब्याटिक फिनिसिङ गरेका थिए । ६२औं मिनेटमा साकाले व्यक्तिगत दोस्रो गोल गर्दै इङ्ल्यान्डलाई अग्रता ४–० को अग्रता दिलाएका थिए । सम्हालिन नसकेको इङ्लिस रक्षापंक्ति छिचोल्दै इरानका मेहेदी तारेमीले ६५औं मिनेटमा गोल फर्काएका थिए ।
पहिलो हाफको तुलनामा दोस्रो हाफमा सुधारिएको प्रदर्शन गरेको इरानले इङ्ल्यान्डको थप तीन गोल रोक्न सकेन । दुई गोल गरेका साकाको स्थानमा ७१औं मिनेटमा मैदान प्रवेश गरेका मार्कस रासफोर्डले पहिलो पासलाई नै गोलमा परिणत गरेका थिए । कप्तान केनले दिएको पासलाई सदुपयोग गर्दै रासफोर्डले उत्कृष्ट गोल गरेका थिए । निर्धारित ९० मिनेटको खेल सकिन एक मिनेट बाँकी रहँदा इङ्ल्यान्डका लागि सब्स्टिच्युट खेलाडी ज्याक ग्रिलिसले छैटौं गोल गरेका थिए । इन्जुरी समयमा इङ्लिस डिफेन्डर जोन स्टोन्सले इरानका तारेमीलाई १८ यार्ड बक्समा लडाएपछि पाएको पेनाल्टीमा इरानले दोस्रो गोल फर्काएको थियो । जसलाई तारेमीले सदुपयोग गरेका थिए ।
इङ्ल्यान्डले शनिबार दोस्रो खेलमा अमेरिकाको सामना गर्नेछ । दुई ठूला प्रतियोगितामा लगातार सेमिफाइनल पुग्ने एक मात्र टिम बनेको इङ्ल्यान्ड जारी विश्वकपको उपाधि दाबेदार हो । सन् २०१८ मा रुसमा भएको विश्वकपको सेमिफाइनलमा पुगेर क्रोएसियासँग पराजित भएको इङ्ल्यान्ड गत वर्ष युरोपियन च्याम्पियनसिपको फाइनलमा इटालीसँग पराजित भएको थियो । इरानले शुक्रबार वेल्सको सामना गर्नेछ ।