नेपालमाला
२२ आश्विन २०७९, शनिबार 
पोखरा : राष्ट्रिय खेलकुद परिषद्का सदस्यसचिव टंकलाल घिसिङले एकजुट भएर नवौं राष्ट्रिय खेलकुद प्रतियोगिता सम्पन्न गर्न आग्रह गरेका छन् । गण्डकी प्रदेशमा यही असोज २८ देखि कात्तिक ३ गतेसम्म आयोजना हुने राष्ट्रिय खेलकुदका लागि गठित विभिन्न उपसमितिका संयोजक तथा सचिवहरुको पोखरामा भएको बैठकलाई सम्बोधन गर्दै सदस्यसचिव घिसिङले सबैको सहयोग र सहकार्यले मात्रै राष्ट्रिय प्रतियोगिता सफल बनाउन सकिने बताए ।
भौतिक रुपमा बैठकमा उपस्थित हुन नसकेका उपसमितिका संयोजक र सचिवहरुका लागि जुममार्फत सञ्चालन गरिएको बैठकमा सबैले आफ्नो उपसमितिको प्रगति विवरण प्रस्तुत गरेका थिए ।
यसैगरी सदस्यसचिव घिसिङले नवौं राष्ट्रिय खेलकुद प्रतियोगिताको अभियानमा जुट्न पोखरेलीहरुसँग आग्रह गरेका छन् । प्रदेश खेलकुद परिषद् गण्डकीले शनिबार विभिन्न संघसंस्थासँग गरेको अन्तक्र्रिया कार्यक्रममा बोल्दै घिसिङले सो आग्रह गरेका हुन् । ‘हामी नवौं राष्ट्रिय खेलकुद प्रतियोगिताको संघारमा छौं । गण्डकी प्रदेश आयोजक भएको नाताले पनि प्रतियोगिता सफल बनाउने जिम्मेवारी यहाँहरुको काँधमा छ’, उनले भने ‘म गण्डकी प्रदेशबासीलाई यो अभियानमा जुट्न आग्रह गर्दछु ।’
खेलकुद ऐन कार्यान्वयनसँगै संघीय रुपमा पहिलो पटक नवौं राष्ट्रिय खेलकुद प्रतियोगिता आयोजना हुन लागेको बताउँदै सदस्यसचिव घिसिङले प्रतियोगिताको महत्व विशेष रहेको बताए । ‘हामी नयाँ खेलकुद विकास ऐनको जगमा उभिएर नवौं राष्ट्रिय खेलकुद प्रतियोगिता गर्दै छौंं । त्यसैले पनि यसको महत्व र मर्म बारे बुझ्न आवश्यक छ’, उनले भने, ‘नवौं राष्ट्रिय प्रतियोगिताको अन्तिम तयारी भइरहेकाले पोखरा आउने खेलाडीहरुलाई न्यानो आतिथ्यताको सन्देसको छोड्न आग्रह गर्दछु ।’
प्रदेश खेलकुद परिषद् गण्डकीका सदस्यसचिव तेज गुरुङले नवौं राष्ट्रिय खेलकुद प्रतियोगिता ३९ वर्ष पछि पुनः गण्डकीले आयोजना गर्न पाउनु गौरवको विषय भएको बताउँदै यसलाई सफल बनाउन पोखरेलीहरुको सहयोग र सहभागिताको खाँचो रहने बताए ।
