नेपालमाला
९ पुष २०७८, शनिबार 
काठमाडौं : शहीद स्मारक ए डिभिजन लिगअन्तर्गत आज दुई ठूला क्लब मनाङ मर्स्याङ्दी क्लब र मच्छिन्द्र फुटबल क्लब भिड्दैछन् । मनाङ सर्वाधिक ८ पटकको लिग विजेता टिम हो । जारी सिजन पाँचौ चरणसम्मको खेलपछि मनाङ शीर्ष स्थानमा छ । छैटौं चरणको खेल सुरु भइसकेको छ । उता साविक विजेता मच्छिन्द्र दोस्रो स्थानमा छ ।
मनाङले ५ मध्ये चार जित र एक बराबरी नतिजाबाट १३ अंक जोडेको छ ।मच्छिन्द्रले भने तीन खेल जित्दा दुई खेल बराबरीमा टुङ्गिएको थियो ।अपराजित शीर्ष दुई टिमबीचको यस खेललाई हेभिवेट भिडन्त समेत भन्न सकिनेछ ।
लिगको करिब मध्यभागतिर आइपुग्दा यी दुई क्लबबीचको भिडन्तले लिग विजेताको बाटोसमेत तय गर्न सक्नेछ अर्थात लिगमा निर्णायक समेत बन्न सक्नेछ ।
अर्को तिर सातौं चरणको खेलपछि शीर्ष स्थानमा रहने क्लबले एएफसी कप क्वालिफायर खेल्नेछ । त्यसमा पनि मनाङ र मच्छिन्द्र नै अघि छन् । यी दुई क्लबसँगै त्रिभुवन आर्मी क्लब पनि त्यो होडमा छ । तर आर्मीको ९ अंक मात्र छ । यस्तोमा मनाङ र मच्छिन्द्रबीचको खेलले नै धेरै हदसम्म एएफसी कप क्वालिफायर पुग्ने टिमको टुङ्गो लाग्नेछ ।
यी तीनवटै क्लबसँग एएफसी क्लब लाइसेन्स छ । त्यसमध्ये सातौँ चरणको समाप्तीङ्गा धेरै अंक जोड्ने क्लबले एएफसी कप छनोट खेल्ने एन्फाले निर्णय गरिसकेको छ ।
आर्मीका प्रशिक्षक नवीन न्यौपानेले एएफसी कप छनोटभन्दा पनि लिग उपाधितिर लक्ष्य बनाउँदै अबका खेल खेल्ने बताएपछि अब मनाङ र मच्छिन्द्र नै यसका लागि दाबेदार छन् ।
मच्छिन्द्रअघिल्लो खेलमा संकटासँग बराबरीमा रोकिँदा मनाङले त्यसको फाइदा उठाउँदै पुलिसलाई पोखरामा ३-१ ले हराएर मच्छिन्द्रमाथि २ अंकको स्पष्ट अग्रता बनाएको छ ।
अब मनाङले मच्छिन्द्रलाई पराजित गरेमा सातौं चरणको खेल खेल्न बाँकी हुँदा नै एएफसी कप छनोटमा स्थान पक्का गर्नेछ । साथै मनाङले ५ अंकको अग्रता बनाउँदै उपाधि होडमा समेत दाबेदारी बलियो बनाउनेछ । मच्छिन्द्रका लागि एएफसी कपको सम्भावना कायम राख्न र उपाधि होडमा पनि रहिरहन मनाङविरुद्ध खेल निकै मह्तपूर्ण छ । त्यसैले पनि यी दुई टिमबीचको खेल बहुप्रतिक्षित हुनेछ ।
मनाङका प्रशिक्षक फुजा तोपेले मच्छिन्द्रसँगको खेलका लागि राम्रो तयारी गरेको र खेल पनि राम्रो हुने बताइसकेका छन् । उनले मच्छिन्द्र राम्रो टिम रहेकोले विपक्षीलाई सम्मान गर्दै जितकै लागि खेल्ने प्रिम्याच कन्फ्रेन्समा बताएका थिए । उनको भनाइ छ, ‘मच्छिन्द्र राम्रो टिम हो । हरेक टिम जित्नकै लागि खेल्छ र सबैलाई सम्मान गर्नुपर्छ,’ फुझाले अंक नगुमाउने रणनीति अनुसार खेल्ने बताए ।
साथै उनले एएफसी कप क्वालिफायरका लागि दुवै टिमलाई दबाब रहेको समेत बताए । ‘दबाब दुवै टिमलाई छ एएफसी कप छनोटमा पुग्न । हामी ३ अंकै लागि खेल्छौँ ,’ उनले भने ।
मच्छिन्द्रका प्रशिक्षक प्रवेश कटुवालले एएफसी कप क्वालिफायरमा पुग्न मनाङविरुद्धको खेल जित्नैपर्ने दबाब रहेको बताएका छन् । ‘हामीलाई जित्नैपर्ने दबाब छ । मनाङ २ अंकले अघि छ । यसअघिको खेल ड्र भयो । अब हुने खेल जितेर अर्को खेल पनि जित्नुपर्छ,’ उभने भने ।
उनले मनाङसँग खेल्दा दबाब हुनेसमेत बुझेका छन् । उनले थपे, ‘मनाङ लिग टपर हो र अपराजित छ । टिम सन्तुलित छ । हाम्रो पनि टिम सन्तुलित छ र त्यही अनुसार रणनीत बनाएको छौँ ।’ कटुवालले टिममा चोटको समस्या भएको तर टिम वर्क महत्वपूर्ण रहेको बताए ।
अघिल्लो खेलमा नियमित कप्तान सुजल श्रेष्ठ र रन्जित धिमालल पूर्ण रुपमा ठिक थिएनन् । मनाङ विरुद्धको खेलमा भने दुवैले खेल्ने उनले बताए । प्रशिक्षक कटुवालले एएफसी कप क्वालिफायर पुग्न मनाङविरुद्धको खेल डिसाइडर हुने पनि बताए ।
इतिहासमा मनाङ हाबी
मनाङले २०४३ सालदेखि ए डिभिजन लिग खेल्न थालेको हो । मच्छिन्द्रले भने २०६२ सालदेखि मात्र माथिल्लो डिभिजनमा खेल्न थालेको हो । मच्छिन्द्र ए डिभिजनमा आएयता मनाङ र मच्छिन्द्रबीच अहिलेसम्म कूल १२ खेल भएको छ । जसमा ७ खेल मनाङले जितेको छ । मच्छिन्द्रले जम्मा २ खेल मात्र जित्दा बाँकी ३ खेल बराबरीमा सकिएको थियो ।
मनाङले सर्वाधिक ८ पटक लिग जित्दा मच्छिन्द्रले २०७६ मा पहिलो पटक लिग जितेको छ । त्यो भनेको यसअघिको सिजन हो । जहाँ मच्छिन्द्रले मनाङबाटै अधिकांश खेलाडी भित्र्याएर थियो र स्टारहरुको टिम बनाएर पहिलो पटक च्याम्पियन बनेको थियो । त्यस सिजन मनाङ र मछिन्द्रले २-२ को बराबरी खेलेका थिए । २०७५ को लिगमा भने मनाङले मच्छिन्द्रलाई १-० ले पराजित गरेको थियो ।
