नेपालमाला
८ पुष २०७८, बिहीबार 
काठमाडौं : एसियन सेन्ट्रल जोन सिनियर महिला भलिबल च्यालेन्ज कपमा नेपालले सुखद् सुरुवात गरेको छ । बंगलादेशको ढाकामा बिहीबार भएको रोमाञ्चक खेलमा श्रीलंकालाई ३–२ को सेटमा पराजित गर्दै नेपालले सुखद् सुरुवात गरेको हो ।
साविक विजेतासमेत रहेको नेपालले सुरुवाती दुई सेट गुमाए पनि उत्कृष्ट पुनरागमन गर्दै ३–२ को जित निकालेको हो । सुरुवाती दुई सेट श्रीलंकाले २५–१९, २५–२१ ले आफ्नो पक्षमा पारेको थियो । त्यसपछिका तीन वटै सेट नेपालले आफ्नो पक्षमा पा¥यो । नेपालले २५–१५, २५–१५, १५–१३ को जित निकाल्दै प्रतियोगितामा सुखद् सुरुवात गरेको हो ।
नेपालले शुक्रबार माल्दिभ्स, शनिबार घरेलु टोली बंगलादेश, आइतबार उज्वेकिस्तान र सोमबार किर्गिस्तानसँग प्रतिस्पर्धा गर्नेछ । सन् २०१९ मा बंगलादेशमै भएको पहिलो संस्करणको उपाधि नेपालले जितेको थियो । प्रतियोगितामा नेपालसहित आयोजक बंगलादेश, माल्दिभ्स, श्रीलंका, किर्गिस्तान र उज्वेकिस्तान छन् । ६ वटै टोलीले राउन्ड रोबिनका आधारमा प्रतिस्पर्धा गर्ने छन् । प्रतियोगिताको शीर्ष दुई टोलीले फाइनलमा प्रतिस्पर्धा गर्नेछ । यसैगरी तेस्रो र चौथो टोलीले तेस्रो स्थानका लागि प्रतिस्पर्धा गर्नेछन् ।
यसैगरी बिहीबार नै भएको पुरुषतर्फको खेलमा भने नेपालले नमिठो हार बेहोरेको छ । एकपक्षीय खेलमा नेपालले घरेलु टोली बंगलादेशसँग ३–० को हार बेहोरेको हो । नेपालले बंगलादेशलाई २५–१७, २५–१७, २५–१९ को नतिजा सुम्पिएको हो । राउन्ड रोबिन लिगका आधारमा हुने प्रतियोगितामा नेपालले शुक्रबार उज्वेकिस्तान र आइतबार श्रीलंकाको सामना गर्नेछ । अन्तिम समयमा माल्दिभ्सले हात झिकेपछि आयोजक बंगलादेश, नेपाल, श्रीलंका र उज्वेकिस्तानले मात्रै प्रतिस्पर्धा गरेका छन् ।
