नेपालमाला
१५ असार २०७८, मंगलवार 
काठमाडौं : १४ औं महाधिवेशन नजिकिएसँगै नेपाली कांग्रेस नेताहरु नेतृत्व लागि आआफ्नै तयारी र रणनीतिमा सक्रिय भएका छन्। सभाापतिका लागि आकांक्षी देखिएका दोस्रो पुस्ताका नेताहरूबीचको अलगअलग जमघट तीव्र भएको छ। खासगरी दोस्रो पुस्ताका तीन नेताहरू कांग्रेस उपसभापति विमलेन्द्र निधि, महामन्त्री डा. शशांक कोइराला र पूर्वमहामन्त्री प्रकाशमान सिंहको साझा सक्रियताले कांग्रेस वृत्त तरंगित भएको छ। यी नेताहरूबीच तेस्रो पटक मंगलबार पनि भलाकुसारी भएको छ।
कांग्रेसका संस्थापक वीपी कोइराला, महेन्द्रनारायण निधि र गणेशमान सिंहका पुत्र तीनै जनाले सभापति आकांक्षा राखेका छन्। सभापति शेरबहादुर देउवाविरुद्ध गठबन्धन बनाएर महाधिवेशनसम्म सहकार्यको तयारीमा रहेका नेताहरु सिंहको निवास चाक्सीबारीमा छलफलमा जुटेका हुन्। एक्लाएक्लै अघि बढ्दा देउवालाई झन् सजिलो हुने भएकोले मिलेर साझा उम्मेदवारी दिने रणनीतिअनुसार छलफल भइरहेको छ। सभापति शेरबहादुर देउवासँग नजिक मानिएका उपसभापति निधि अहिले संस्थापनतिर छैनन्। उनी आफैँ सभापतिको उम्मेदवार बन्ने तयारीमा बढेका छन्।
सिंहका स्वकीय सचिव यूपी लामिछानेका अनुसार नेताहरूबीच महाधिवेशन केन्द्रित भएर निरन्तर छलफलमा व्यस्त भएका हुन्। उनकाअनुसार यसअघि निधि र सिंह कोइराला निवास महाराजगञ्ज र त्यसभन्दा पहिले कोइराला र सिंह निधि निवास बानेश्वरमा पुगेर छलफल गरेका थिए। तीनजनाबीचको शृखंलावद्ध भलाकुसारीबाट नेतृत्वका लागि आकांक्षी देखिएका अरू नेताहरू पनि झस्केका छन्। तीनजना पात्र मिलेमा कांग्रेस महाधिवेशनको अंकगणितसमेत उथलपुथल हुने भएकोले यो सक्रियतालाई महत्वका साथ हेरिएको छ।
यस अगाडिको छलफलपश्चात पत्रकार माझ निधीले भनेका थिए, ‘हामी नयाँ गुट बनाउन होइन, आगामी चुनाव र कांग्रेस महाधिवेशनको विषयमा छलफल गर्न बसेका हौं।’ यसैगरी महामन्त्रीडा. शशांक कोइराला भने, ‘हामीमा सहमतिको सम्भावना प्रबल बनेको छ। हाम्रो मुख्य उद्देश्य भनेकै पार्टीलाई एकजुट बनाउनु हो। हामी सहमतिमै को सभापति, को महामन्त्री बन्ने निर्णय गर्छौं। अहिले मात्र होइन, महाधिवेशनपछिसम्म पनि एक भएर जाने सम्भावना बढेर गएको छ।’
पूर्वमहामन्त्री सिंहले आगामी महाधिवेशनमा सबैलाई लैजानसक्ने प्रयासबारे छलफल भइरहेकाले अब हामी निरन्तर बैठक गर्ने र छलफल सकारात्मक दिशामा अगाडि बढेको प्रतिक्रिया दिएका थिए।
सोमबार कांग्रेसका केन्द्रीय सदस्य एवम् पूर्व उपप्रधानमन्त्री सुजाता कोइराला निवास मण्डिखाटारमा वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौला छलफलमा जुटेका थिए। सहमति, सहकार्य र एकताका साथ आसन्न महाधिवेशन अगाडि बढाउने भन्ने बारेमा केन्द्रीत रहेर छलफल भएको केन्द्रीय सदस्य कोइरालाले जानकारी दिइन्। उनले भनिन्, ‘गुट उपगुटका कारण पार्टी कमजोर भयो, आगामी महाधिवेशनमा पार्टीलाई कसरी बलियो र एकताबद्ध बनाउन सकिन्छ भन्ने बारेमा छलफल भएको हो।’
यसैगरी सोमबारै केन्द्रीय सदस्य शेखर कोइरालाले वरिष्ठ नेता रामचन्द्र पौडेललाई भेटेका थिए। नेपाली कांग्रेसको सभापतिमा उठ्ने तयारी गरेका कोइरालाले पौडेललाई भेट्न उनकै निवास बोहराटार पुगेका थिए। पौडेल र कोइरालाले एकअर्कालाई महाधिवेशनमा सहयोग मागेको बताइएको छ। स्रोतकाअनुसार कोइरालाले पौडेललाई भावी प्रधानमन्त्रीमा सहयोग गर्न सकिने बताएका छन् भने पौडेलले आफू सभापति हुने इच्छा गरेको जवाफ दिएका थिए।
यस्तै, सभापति देउवाले पनि आगामी महाधिवेशनमा अन्तिम पटक सभापति लड्ने भन्दै आफूनिकट केन्द्रीय सदस्यहरुसँग छलफल अगाडि बढाएका छन्। कांग्रेसको सभापतिका लागि १२ जनाभन्दा बढीले दाबी गरेका छन्। वरिष्ठ नेता रामचन्द्र पौडेल पक्षमा मात्रै ८ जना दाबेदार छन्। सभापति शेरबहादुर देउवा पक्षमा देउवासहित विमलेन्द्र निधि र गोपालमान श्रेष्ठको दाबी छ। कृष्णप्रसाद सिटौलासमेत सभापतिको चर्चामा छन्।
पौडेलले आफू एक पटक मात्रै चुनाव लड्ने भन्दै सहयोगका लागि आग्रह गरेका छन्। अब देउवा र पौडेलबाट नचल्ने भएकाले आफूलाई उम्मेदवार बनाउन अन्य नेताले आग्रह गरेका छन्। डा.शेखर कोइरालाले विगत लामो समयदेखि सभापतिका लागि भन्दै अभियान नै सञ्चालन गरिरहेका छन्। कांग्रेस महाधिवेशन भदौ १६ देखि १९ गतेसम्म निर्धारित छ। पटक-पटक सर्दै आएको महाधिवेशन कोरोना भाइरसका कारण हुने/नहुनेमा भने अधिकांश नेता नै सशंकित छन्।
