नेपालमाला
१० जेष्ठ २०७८, सोमबार 
पेरिस : साविक विजेता पेरिस सेन्ट जर्मेन (पीएसजी) लाई एक अंकले स्तब्ध पार्दै लिलेले फ्रान्सेली लिग वानको उपाधि जितेको छ । आइतबार भएको अन्तिम चरणको खेलमा एन्जर्समाथि २–१ को जित दर्ता गर्दै लिले च्याम्पियन बनेको हो । पीएसजीले पनि अन्तिम खेलमा ब्रेस्टलाई २–० गोलले पराजित गरे पनि एक अंकले पछि प¥यो ।
लिलेले ३८ खेलबाट ८३ अंक जोड्यो । पीएसजीले भने ३८ खेलमा ८२ अंक मात्रै जोड्न सक्यो । लिलेले २४ जित, ११ बराबरी खेल्दै तीन खेलमा मात्र हार बेहो¥यो । पीएसजीले भने २६ खेलमा जित हात पार्दै चार बराबरी र आठ खेलमा पराजय भोगेको थियो ।
एन्जर्सविरुद्ध लिलेले खेलको १०औं मिनेटमा जोनाथन डेविडको गोलमा अग्रता लिएको थियो । पोर्चुगिज मिडफिल्डर रेनाटो सान्चेसको पासलाई सदुपयोग गर्दै डेविडले लिलेलाई उपाधि नजिक पु¥याएका थिए । पहिलो हाफको इन्जुरी समयमा बुराक इल्माजले गोल गर्दै लिलेको अग्रता दोब्बर बनाए । इन्जुरी समयमा एन्गेलो फुल्गिनीले गोल गरे पनि जितका लागि पर्याप्त भएन ।
लिलेले चौथो पटक लिग वानको उपाधि जितेको हो । लिलेले सन् २०१० पछि पहिलो पटक उपाधि जितेको हो । लिलेले यसअघि सन् १९४५, १९५३ र २०१० मा फ्रेन्च लिग वानको उपाधि जितेको थियो । पीएसजी भने पछिल्लो नौ वर्षमा दोस्रो पटक उपाधि बिमुख भयो ।
