उबरको नेपाल यात्रा सुरु

उबरले विभिन्न देशमा निजी कारलाई समेत व्यावसायिक राइड–हेलिङमा प्रयोग गर्न दिने गरेको छ । तर नेपालमा निजी सवारीसाधन (रातो प्लेट) लाई भाडामा प्रयोग गर्न पाइने कि नपाइने भन्ने विषय लामो समयदेखि बहसमा रहँदै आएको छ । यो अन्योललाई सम्बोधन गर्ने गरी सरकारले ‘डिजिटल मोबिलिटी सेवा सञ्चालन मापदण्ड २०२६’ को मस्यौदा तयार पारी नियमनको प्रक्रिया अघि बढाएको छ ।

नेपालमा उबर मात्र नभई अन्य ठूला अमेरिकी प्रविधि कम्पनीहरूले पनि व्यवसाय विस्तार र लगानीमा चासो देखाएको अमेरिकी कूटनीतिज्ञ र प्रविधि क्षेत्रका जानकारहरूले बताउँदै आएका छन् । अमेरिकी कार्यवाहक राजदूत स्कट अब्रामले सूचना तथा सञ्चारमन्त्री विक्रम तिमिल्सिनासँगको भेटमा नेपालको सूचना प्रविधि क्षेत्रमा अमेरिकी निजी क्षेत्रका लगानीकर्ताको गहिरो रुचि रहेको जनाएका थिए । सरकारले पनि सूचना प्रविधि क्षेत्रमा वैदेशिक लगानीको न्यूनतम सीमा (थ्रेसहोल्ड) हटाएर लगानीको वातावरण सहज बनाउने प्रयास गरिरहेको छ ।

हाल नेपालमा प्रत्यक्ष र संयुक्त लगानी (जेभी) वा फ्रेन्चाइजका रूपका केही अमेरिकी कम्पनी सञ्चालनमा छन् । सूचना प्रविधि सेवा निर्यात गर्ने कोटिभिटी, लिपफ्रग टेक्नोलोजीदेखि अमेरिकी स्टक एक्सचेन्ज नासडाकमा सूचीकृत फ्युजमसिन्सका मुख्य कार्यालय नेपालमा छन् । कोकाकोला, पेप्सिको जस्ता पेय पदार्थ पनि लामो समयदेखि नेपाली बजारमा छन् । अमेरिकी ब्रान्ड केएफसी र पिज्जा हट देवयानी इन्टरनेसनलमार्फत नेपालमा सञ्चालनमा छन् । डीएचएल कुरिअर सेवा, वेस्टर्न युनियनलगायत अमेरिकी सेवा प्रदायकको नेपालमा उपस्थिति छ । पछिल्लो समय अमेरिकी लगानीकर्ताले नेपालको सूचना प्रविधि क्षेत्रमा बढी चासो देखाएको पाइन्छ ।