नेपालमाला
१६ बैशाख २०७८, बिहीबार 
दिल्ली : चेन्नई सुपर किङ्स इन्डियन प्रिमियर लिग (आईपीएल) टी-ट्वान्टी क्रिकेटको शीर्ष स्थानमा उक्लिएको छ । दिल्लीमा बुधबार राति भएको खेलमा सनराइजर्स हैदरावादलाई ७ विकेटले पराजित गर्दै चेन्नई शीर्ष स्थानमा उक्लिएको हो ।
हैदरावादले दिएको १ सय ७२ रनको लक्ष्य चेन्नईले १८ ओभर ३ बलमा मात्र ३ विकेट गुमाएर पूरा गर्यो । चेन्नईको जितमा रुतुराज गायकवाड र फाप डु प्लेसिसले अर्धशतकीय पालि खेले ।
गायकवाडले ७५ रनको पालि खेल्दा प्लेसिसले ५६ रन बनाए । मोइन अलि १५ रनमा आउट भए ।
सुरेश रैना १७ र रविन्द्र जडेजाले अविजित ७ रन बनाए । हैदरावादका राशिद खानले ३ विकेट लिए । यस अघि टस जितेर पहिले ब्याटिङ गरेको हैदरावादले २० ओभरमा ३ विकेट गुमाएर १ सय ७१ रन बनाएको थियो । हैदरावादका लागि मनिस पाण्डेले ६१ रनको अर्धशतकीय इनिङ्स खेले । यस्तै कप्तान डेभिड वार्नरले ५७ रनको पालि खेले । केन विलियम्स २६ र केदार जादब १६ रनमा अविजित रहे । चेन्नईका लुंगी एनजिडीले २ तथा साम कुरनले १ विकेट लिए ।
जितसँगै चेन्नईले ६ खेलमा १० अंक जोडेको छ । चेन्नईको यो पाँचौ जित हो । हैदरावादको यो पाँचौ हार हो । पुछारको हैदरावादले ६ खेलमा २ अंक जोडेको छ ।
