एएफसी कप : आर्मीको लक्ष्य स्पष्ट जित

काठमाडौं : एएफसी कपको प्लेअफमा नेपालको त्रिभुवन आर्मी फुटबल क्लबले बुधबार श्रीलंकन पुलिस स्पोर्ट्स क्लबसँग प्रतिस्पर्धा गर्दैछ । दशरथ रंगशालमा हुने पहिलो लेगको खेलमा आर्मीको लक्ष्य स्पष्ट जित रहेको छ ।
आर्मीका प्रशिक्षक नवीन न्यौपाने टोलीको एउटै लक्ष्य जित रहेको बताए । ‘हामी जितका लागि खेल्नेछौं । खेलाडीको मनोबल उच्च रहेकाले घरेलु दर्शकलाई खुसी बनाउने छौं,’ मंगलबार आयोजित पत्रकार सम्मेलनमा नवीनले भने । आर्मीले दोस्रो खेल भारतको बेंगलुरु फुटबल क्लबसँग अप्रिल १४ मा खेल्नेछ । भारतीय टोलीलाई पनि हराएमा आर्मी प्लेअफको फाइनल पुग्नेछ । प्लेअफको विजेता टोलीले समूह ‘डी’ मा स्थान बनाउने छ ।
यसैगरी श्रीलंकन पुलिसका प्रशिक्षक झिलाउ अल्पेन्सुले टोलीले छोटो तयारी गरे पनि राम्रो नतिजा निकाल्ने बताए । ‘कोरोनाका कारण लामो समय तयारी गर्न पाएनौं तर पनि नेपाल आर्मीलाई राम्रो टक्कर दिनेछौं,’ झिलाउले भने । आर्मीले एएफसी (एसियन फुटबल फेडरेसन) को क्लब लाइसेन्स प्राप्त गरेपछि पहिलो पटक एएफसीको प्रतियोगिता खेल लागेको हो । आर्मी गत वर्षको सहिद स्मारक ‘ए’ डिभिजन लिगमा उपविजेता बनेको थियो । मच्छिन्द्र च्याम्पियन बनेपनि क्लब लाइसेन्स नहुँदा आर्मीले मौका पाएको हो ।