नेपालमाला
२१ चैत्र २०७७, आईतवार 
काठमाडौं : कोभिड–१९ को महामारी र लकडाउनपछि खेलकुदका गतिविधिमा वृद्धि भएको छ । यसै क्रममा झुम्का ब्याडमिन्टन क्लबले प्रदेश १ स्तरीय मेयर कप ब्याडमिन्टन प्रतियोगिता चैत २७ र २८ गते आयोजना गर्न लागेको छ । एक महिनाको बिचमा प्रदेश १ मा आयोजना हुन लागेको दोस्रो मेयरकप प्रतियोगिता हो । एक महिना अघि मात्र भोजपुर प्रतियोगिता सम्पन्न भएको थियो ।
रामधुनी नरगापालिका झुम्का, सुनसरीमा आयोजना हुने प्रतियोगितामा पुरुष युगल खुला, यू–१७ छात्रा एकल, खुला महिला एकल, भेट्रान्स ४५ माथि र आन्तरिक खेलाडीहरु गरी पाँच विधामा करिव २०० सय खेलाडीहरुले प्रतिस्पर्धा गर्ने आयोजकले जनाएको छ ।
करिव १२ लाखको लागत रहेको प्रतिस्पर्धामा पुरुष युगलतर्फका शीर्ष तीन विजेताले नगद ३० हजार, २० हजार र १० हजार पुरस्कार प्राप्त गर्ने छन् । यस्तै यू–१७ छात्रा र खुला महिला एकलतर्फका शीर्ष तीनले १० हजार, सात हजार र तीन हजार पुरस्कार पाउने छन् । भेट्रान्सतर्फका विजेताले १५ हजार, १० हजार र सात हजार तथा आन्तरिकतर्फका विजेताले १५ हजार, १० हजार र पाँच हजार पुरस्कार प्राप्त गर्ने प्रतियोगिता संयोजक पुष्प दाहालले जानकारी दिए ।
प्रतियोगितामा नाम दर्ताका लागि प्रतिखेलाडी एक हजार र दर्ता गर्ने समय चैत २४ गतेसम्म रहेको संयोजक दाहालले बताए ।
