नेपालमाला
५ चैत्र २०७७, बिहीबार 
काठमाडौं : युरोपको प्रतिष्ठित क्लब फुटबल प्रतियोगिता युरोपियन च्याम्पियन्स लिग २०२०–२१ को क्वार्टरफाइनलमा पुग्ने आठ टोलीको टुङ्गो लागेको छ । अन्तिम १६ अन्तर्गत बुधबार राति भएको खेलमा चेल्सी र बार्यन म्युनिख विजयी भएपछि यस सिजन क्वाटरफाइनल खेल्ने आठ वटै टोलीको छिनोफानो भएको हो । चेल्सीसँगै इङ्ल्यान्डबाट म्यानचेष्टर सिटी र लिभरपुल गरी तीन क्लब क्वार्टरफाइनल पुगेका छन् । यस्तै जर्मनीबाट बार्यन र बोरुसिया डर्टमन्डले अन्तिम आठमा स्थान बनाए ।
यस बाहेक स्पेनबाट सर्वाधिक १३ पटकको च्याम्पियन रियल म्याड्रिडमात्र क्वार्टरफाइनल पुग्न सक्यो । स्पेनिस क्लबहरु बार्सिलोना, एट्लेटिको म्याड्रिड र सेभिल भने अन्तिम १६ बाटै बाहिरिए ।
फ्रान्सबाट पेरिस सेन्ट जर्मन (पीएसजी) र पोर्चुगलबाट एफसी पोर्टो क्वार्टरफाइनलमा पुगेका छन् । युरोपको शीर्ष पाँच लिगमध्ये इटालियन सिरी एबाट भने कुनै टोली क्वार्टरफाइनल पुग्न सकेनन् ।
इटालियन क्लब युभेन्ट्स, लाजियो र एटलान्टा अन्तिम १६ बाटै बाहिरिएका हुन् । क्वार्टरफाइनल पुगेकामध्ये म्यानचेष्टर सिटी र पीएसजी बाहेक अरु ६ क्लब पूर्वविजेता समेत हुन् । पीएसजी गत सिजन फाइनल पुगेपनि बार्यनसँग पराजित भएको थियो । सिटीको उत्कृष्ट नतिजा २०१६ मा सेमिफाइनल पुग्नु थियो ।
अब क्वार्टरफाइनल र सेमिफाइनलका खेलहरु शुक्रबार स्वीट्जरल्यान्डको नियोनमा हुनेछ । क्वार्टरफाइनलको पहिलो लिगका खेलहरु अप्रिल ६–७ मा हुनेछ भने दोस्रो लेग अप्रिल १३–१४ मा हुनेछ ।
यस्तै सेमिफाइनलको पहिलो लेगका खेलहरु अप्रिल २७–२८ मा हुनेछ भने दोस्रो लेगका खेल मे ४–५ मा हुनेछ ।
फाइनल खेल मे २९ मा टर्कीको स्तानबुलस्थित आटाटुर्क ओलम्पिक स्टेडियममा हुनेछ ।
