नेपालमाला
४ बैशाख २०७७, बिहीबार 
सियोल : कोरोना भाइरसको विश्वव्यापी महामारीकाबीच भएको संसदीय निर्वाचनमा दक्षिण कोरियाको सत्तारूढ पार्टीले जित हात पारेको छ ।
सामाजिक दूरी कायम गरी उच्च सतर्कता अपनाएर सम्पन्न भएको निर्वाचनमा राष्ट्रपति मुन जाइ इनको डेमोक्रेटिक पार्टीले कुल तीन सयमध्ये एक सय ६३ सिट जितेको हो । अहिलेसम्म ९९ प्रतिशत भोट गनिसकेको जनाइएको छ ।
सत्तारुढ गठबन्धनकै प्लेटफर्म पार्टीले १७ सिट जित्ने अनुमान गरिएको छ । यससँगै सत्तारुढ गठबन्धनको राष्ट्रिय सभामा एक सय ८० सिट पुग्न सक्ने बताइएको छ । विपक्षी युनाइटेड फ्युचर पार्टीले भने निर्वाचनमा एक सय तीन सिट जित्ने अनुमान गरिएको छ ।
दक्षिण कोरियामा सत्तारुढ डेमोक्रेटिक पार्टीले स्पष्ट बहुमत ल्याउनुलाई कोरोना भाइरसविरुद्ध सरकारले चालेको कदमको अनुमोदनको रुपमा हेरिएको छ । यससँगै दक्षिण कोरियामा सन् १९८७ को प्रजातान्त्रिक निर्वाचनपछि सबैभन्दा ठूलो बहुमतको सरकार देखिएको हो । साथै १६ वर्षपछि दक्षिण कोरियामा वामपन्थी पार्टीले स्पष्ट बहुमत पाएको हो ।
कोरोना भाइरसको महामारी नियन्त्रणको लागि दक्षिण कोरिया सफल भएको मानिएको छ । दक्षिण कोरियामा अहिलेसम्म कोरोना भाइरसका १० हजारभन्दा बढी संक्रमित फेला परिसकेका छन् । साथै दुई सय २९ जनाको मृत्यु भइसकेको छ । दक्षिण कोरियाले भाइरस नियन्त्रणको लागि आफ्नो प्रयास भने जारी राखेको छ । सरकारका अनुसार अहिले दक्षिण कोरियामा ६० हजार मानिस क्वारेन्टाइनमा छन् ।
