नेपालमाला
११ माघ २०८२, शनिबार 
काठमाडौं : थाइल्यान्डको तोकोम चोनबुरी सहरमा आयोजना भएको तेस्रो हिरोज तेक्वान्दो च्याम्पियनसिपमा नेपालका पारस भण्डारीले स्वर्ण पदक जितेका छन् । काठमाडौंको सीतापाइला तेक्वान्दो डोजाङका खेलाडीसमेत रहेका पारसले ३० वर्षमुिनको एकल पुम्सेमा स्वर्ण पदक जितेका हुन् । पारसले फाइनलमा थाइल्यान्डका खेलाडीलाई पछि पार्दै स्वर्ण पदक प्राप्त गरेका हुन् ।
शनिबार भएको प्रतियोगितामा पारससँगै सुरज घिमिरे र सुरज लो तामाङले पनि स्वर्ण पदक जितेका छन् । काभ्रेको कुशादेवी तेक्वान्दो डोजाङका खेलाडी सुरजले कलर बेल्ट विधाको १७ वर्षमाथिको एकल पुम्सेमा र नुवाकोटको चन्द्रज्योति तेक्वान्दो डोजाङका सुजलले ३३ केजीमुनिको तौल समूहको ग्योरोगी विधामा स्वर्ण पदक जितेको नेपाली टोलीका प्रशिक्षक बब्लु सिवाकोटीले जानकारी दिए ।
यसैगरी सीतापाइला डोजाङकै खेलाडी श्रीयस तिवारी सेमिफाइनलमा पराजित हुँदै कांस्य पदकमा सीमित भएका थिए । उनले सेमिफाइनलमा थाइल्यान्डका खेलाडीसँग पराजित भएका थिए । शनिबार भएको एक दिने प्रतियोगितामा १३ देशका खेलाडीहरुको सहभागिता रहेको प्रशिक्षक सिवाकोटीले जानकारी दिए । प्रतियोगितामा सहभागी हुन नेपाली टोली शुक्रबार थाइल्यान्ड प्रस्थान गरेको थियो । टोली सोमबार स्वदेश फर्किने छ ।
