कांग्रेस महासमितिलाई एजेन्डा केन्द्रित बनाउन दबाब

कांग्रेसमा ०४६ सालदेखि अवसर पाएकाहरूकै रजगज चलिराख्दा नयाँले अवसर नपाएको र युवाको आकर्षण नहुने चिन्ता बढेको केन्द्रीय सदस्य नैनसिंह महर बताउँछन् । उनीसहित करिब दुई दर्जन केन्द्रीय र महासमितिका सदस्यहरू राष्ट्रिय र पार्टीभित्रको आन्तरिक मुद्दालाई सामूहिक रूपमा उठान गर्न छलफलमा छन् । महरले महासमितिमा चुनावी गठबन्धन, सुशासन र पार्टीभित्रको न्यायोचित अवसरको वितरण नै मुख्य मुद्दा हुने बताए । भने, ‘अवसर पाएको र उमेरका आधारमा पुरानो पुस्ताले नयाँलाई बाटो खाली गरिदिनुपर्छ भन्ने मुद्दा उठाउने प्रयत्न गरिरहेका छौं ।’

कांग्रेसभित्र केन्द्रदेखि तलसम्म चुनावी गठबन्धनमा जान नहुने मत सशक्त छ । गठबन्धनको विपक्षमा रहेका नेताहरूले चुनावी गठबन्धन गर्दा पार्टीको वैचारिक र सांगठनिक धरातल कमजोर भएको बताउने गरेका छन् । नेता शेखर कोइराला, महामन्त्रीद्वय गगन थापा, विश्वप्रकाश शर्मादेखि संस्थापन र इतर दुवैतिरका अधिकांश नेता तथा कार्यकर्ता चुनावी गठबन्धनको पक्षमा छैनन् । आसन्न महासमिति बैठकबाट चुनावी गठबन्धनमा नजाने नीति पारित गराउन नेता कोइराला र महामन्त्री थापासहितका नेताहरू नै जुटिरहेका छन् । पार्टी सभापति शेरबहादुर देउवालाई भने यस्तो गतिविधिले झस्काएको छ ।

कांग्रेसका एक पदाधिकारीका अनुसार देउवा यसै महासमिति बैठकबाट चुनावी गठबन्धनको पक्ष वा विपक्षमा कुनै निर्णय गराउन चाहिरहेका छैनन् । देउवा, दाहाल र एकीकृत समाजवादीका अध्यक्ष माधवकुमार नेपालबीच आलोपालो प्रधानमन्त्री हुने सहमति छ । दाहालपछि नेपाल र अन्तिम डेढ वर्ष देउवाले सरकारको नेतृत्व लिने सहमति छ ।

‘चुनावपछि सरकार बनाउन गरिने गठबन्धनलाई अस्वाभाविक मानिएको छैन । अब चुनावी गठबन्धनको पुनरावृत्ति गर्न हुन्न भन्नेमा आम भनाइ छ । त्यसका लागि महासमिति बैठकले नीतिगत निर्णय लिने अवसर छ,’ केन्द्रीय सदस्य पौडेलले भने । तरुण दलका पूर्वमहासचिवसमेत रहेका युवा नेता भूपेन्द्रजंग शाहीले महासमितिलाई औपचारिकतामा सम्पन्न गर्ने र कर्मकाण्डी बनाउने काम नहोस् भनेर आफूहरूले बहस चलाइरहेको बताए । कांग्रेसको सांगठनिक अवस्था पनि ‘लथालिंग’ छ । विधानले सभापतिलाई ६ महिनाभित्र गरिसक्नुपर्ने भनेर तोकिएको विभाग गठनको काम दुई वर्षभन्दा बढी बितिसक्दा पनि हुन सकेको छैन । भ्रातृ संस्थाहरूको अधिवेशन हुन नदिएर वर्षौंदेखि तदर्थवादमा चलाइएको छ । १४ औं महाधिवेशनबाट उपसभापतिमा धनराज गुरुङ, महामन्त्रीमा गगन थापा र विश्वप्रकाश शर्माको जितसँगै कांग्रेस वृत्तमा ठूलो आशा सञ्चारित भएको थियो । तर, उनीहरूको प्रवेशले पनि पार्टी रूपान्तरणको दिशामा अघि बढ्न सकेको छैन । ‘महामन्त्रीले गर्न नखोजेको होइन, नेतृत्वलाई डोर्‍याएर पार्टीलाई रूपान्तरण गर्न धेरै प्रयत्न गर्नुभयो तर सभापतिले नै अटेर गरिदिएपछि उहाँहरूको पनि जोर चलेन,’ अर्का एक पदाधिकारीले भने ।

यता केन्द्रीय सदस्यहरू सभापति, उपसभापति र महामन्त्री गरेर पाँच जना पदाधिकारीले केन्द्रीय कार्यसमिति भनेको केही होइन जस्तो बनाउन खोजेको आरोप लगाएका छन् । केन्द्रीय सदस्य महर महासमिति बैठकमा प्रस्तुत हुने राजनीतिक/आर्थिक दस्ताबेजहरूमा केन्द्रीय सदस्यको सोधखोज नहुनु दुर्भाग्य भएको बताए । महरले भने, ‘पार्टीभित्रको सामूहिक विचार र भावनाको प्रतिनिधित्व हुन छाडेको छ । केन्द्रीय सदस्यहरूको भूमिका बैठकमा पदाधिकारीहरूले ल्याएको प्रस्तावमा ताली पिट्नेबाहेक अरू नभएको जस्तो भएको छ ।’