नेपालमाला
२४ पुष २०८०, मंगलवार 
काठमाडौं : नेपाल तेक्वान्दो संघ काठमाडौं जिल्लाले वरिष्ठ तेक्वान्दो प्रशिक्षक नोर्बु लामालाई सम्मान गरेको छ । विगत साढे दुई दशकभन्दा लामो समयदेखि राष्ट्रिय तथा अन्तर्राष्ट्रिय खेलाडी उत्पादनमा पु¥याएको योगदानको कदर गर्दै लामालाई काठमाडौं जिल्लाले वार्षिक साधारणसभाका अवसरमा मंगलबार सम्मान गरेको हो ।
राष्ट्रिय खेलकुद परिषद्का वरिष्ठ प्रशिक्षक लामाले स्युचाटार तेक्वान्दो डोजाङमार्फत राष्ट्रिय तथा अन्तर्राष्ट्रिय खेलाडी उत्पादन गर्दै आएका छन् । स्युचाटार डोजाङका खेलाडीले विभिन्न घरेलु प्रतियोगितासँगै दक्षिण एसियाली खेलकुद (साग), एसियाली खेलकुदलगायत अन्तर्राष्ट्रिय प्रतियोगितामा उत्कृष्ट प्रदर्शन गर्दै आएका छन् ।
लामालाई तारकेश्वर नगरपालिकाका प्रमुख कृष्णहरि महर्जन, नेपाल तेक्वान्दो संघका उपाध्यक्ष भानबहादुर चन्द, महासचिव दीपराज गुरुङ र काठमाडौं जिल्ला अध्यक्ष विक्रम खड्गीले सम्मान गरेका थिए । सोही कार्यक्रममा कपन डोजाङका प्रमुख श्याम थापा र ढल्को डोजाङ प्रमुख राजेन्द्र पुजारीलाई पनि सम्मान गरिएको थियो । काठमाडौं जिल्ला अध्यक्ष खड्गीले दुई दशकभन्दा लामो समयदेखि डोजाङ खोलेर खेलाडी उत्पादनमा सक्रिय रहँदै आएका एक जना वरिष्ठ प्रशिक्षकलाई हरेक वर्ष सम्मान गरिने बताए ।
