नेपालमाला
१४ भाद्र २०८०, बिहीबार सुर्खेत : प्रधानमन्त्री पुष्पकमल दाहालले प्रमुख प्रतिपक्ष नेकपा (एमाले)लाई संकेत गर्दै नेता र कार्यकर्तामा हैरानी भइरहेको टिप्पणी गरेका छन् । समाजवादी मोर्चाले कर्णाली प्रदेशको राजधानी सुर्खेतमा बिहीबार आयोजना गरेको सन्देश सभालाई सम्बोधन गर्दै प्रधानमन्त्री दाहालले एमालेभित्र विभाजन हुन लागेको टिप्पणी गरेका हुन् ।
प्रतिपक्षभित्र नेता र कार्यकर्तामा चरम असन्तुष्टि रहेको र त्यो बाहिर आउने अवस्थामा पुगेको माओवादी केन्द्रका अध्यक्षसमेत रहेका प्रधानमन्त्री दाहालको भनाइ थियो । ‘म अहिले नाम लिएर धेरै भन्दिनँ, आफूलाई धेरै ठूलो पार्टी भन्ने हाम्रा प्रतिपक्षभित्र यति ठूलो धाँजा परेको छ, नेताहरूको विशाल पंक्ति, कार्यकर्ताहरूको विशाल पंक्ति हैरान-परेशान भएर कहीँ न कहीँ विस्फोट हुने परिस्थितिमा पुगेको छ ।’
एमालेभित्रको विवाद सार्वजनिक भएर विभाजन भएमा कम्युनिस्ट आन्दोलन नयाँ शिराबाट ध्रुवीकृत हुने दाहालको विश्वास छ । ‘त्यहाँबाट फेरि कम्युनिस्ट आन्दोलन नयाँ शिराबाट ध्रुवीकृत हुनेछ भन्ने विश्वास छ,’ उनले भने ।
प्रधानमन्त्री दाहालले भ्रष्टाचारविरुद्ध र सुशासनको पक्षमा जनताले सडकबाट दबाब दिनुपर्ने बताए । समाजवादी मोर्चाले बर्खायाम सकिएपछि जनतालाई भ्रष्टाचारविरुद्ध, सुशासन, जनजिवीका, राष्ट्रियता, न्यायका पक्षमा सडकमा उतार्नुपर्ने उनको भनाइ थियो ।
सरकारले मात्रै कदम चालेर भ्रष्टाचारविरोधी अभियान सफल नहुने दाहालले बताए । तत्कालीन प्रधानमन्त्री केपी शर्मा ओलीले प्रतिनिधिसभा दुई पटक विभाजन गरेपछि नेताहरूका विज्ञप्ति र सडक प्रदर्शनले मात्रै पुन:स्थापना नभएको दाहालले स्मरण गराए । मुलुकका विभिन्न जिल्लाबाट काठमाडौं गई जनताले प्रदर्शन गरेपछि प्रतिनिधिसभा पुन:स्थापना सम्भव भएको उनको भनाइ थियो । उनले भने, ‘पटक-पटक सदन विघटन गरियो, संविधान मिचेर । नेताले वक्तव्य निकालेर मात्रै हुनेवाला थिएन । जनता आन्दोलित भएपछि कसैले पनि विघटनलाई साथ दिनसक्ने अवस्था भएन ।’
समाजवादी मोर्चा बनेदेखि नै भत्काउन सकिन्छ कि भनेर अनेक प्रयत्न भएको दाहालले बताए । तर, सत्तारुढ दल कांग्रेस र समाजवादी मोर्चामा आबद्ध राजनीतिक दलहरू सँगसँगै रहेको उनको भनाइ थियो । गणतन्त्र र परिवर्तनको पक्षमा अहिलेको सत्तारुढ गठबन्धन प्रतिबद्ध रहेको उनले बताए ।
