नेपालमाला
२४ आश्विन २०७९, सोमबार 
काठमाडौं : पोखरामा जारी नवौं राष्ट्रिय खेलकुदअन्तर्गतको फेन्सिङको पहिलो स्वर्ण बागमती प्रदेशले जितेको छ । बागमतीले महिला ब्यक्तिगत साबर बिधामा स्वर्ण जितेको हो । शिक्षा नापितले बागमतीलाई पहिलो स्वर्ण दिलाएकी हुन् । उनले विभागीय टोली एपीएफकी उर्मिला लामालाई पराजित गरिन् । तेस्रो स्थानमा त्रिभुवन आर्मी क्लबकी रविना थापा र मनिषा श्रेष्ठ रहे ।
पोखरा कभर्डहलमा भएको प्रतियोगिताको महिला ब्यक्तिगत ईपीमा आर्मीले बर्चस्व बनायो । आर्मीकी इन्दिरा पौडेलले स्वर्ण जित्दा सीता पाठकले रजत र आर्मीकै पुजन कुमाल र एपीएफकी जानुका स्याङतानले कांस्य जिते ।
पुरुषको व्यक्तिगत फोयलमा सुदूरपश्चिम प्रदेशका जलेन्द्र शाहीले स्वर्ण जिते । उनले बागमतीका सञ्जीप लामालाई पराजित गरे । आर्मीका वीरसिंह शाही र एपीएफका शेरसिंह ऐरीले कांस्य पदकमा चित्त बुझाए ।
विजेता खेलाडीलाई बागमती प्रदेशका सदस्य सचिव सूर्यलाल भण्डारी, सुदूरपश्चिम प्रदेशका सदस्यसचिव दीपक सिंह र राष्ट्रिय खेलकुद परिषद्का प्रशासन विभाग प्रमुख मधुसुदन बस्नेतले पुरस्कृत गरेका थिए ।
असोज २८ गतेसम्म सञ्चालन हुने प्रतियोगितमा चार प्रदेश र दुई विभागीय टोलीको सहभागिता रहेको छ । प्रतियोगितामा प्रदेश १, बागमती, गण्डकी र सुदूरपश्चिम प्रदेश, त्रिभुवन आर्मी क्लब र एपीएफ क्लबको सहभागिता रहेको छ । नवौं राष्ट्रिय खेलकुदको पहिलो स्वर्ण भने नेपाल पुलिस क्लबले जितेको थियो । पुलिसले पुरुष क्रिकेटमा पहिलो स्वर्ण जितेको हो ।
