नेपालमाला
४ आश्विन २०७९, मंगलवार 
काठमाडौं : देश अहिले प्रतिनिधिसभा र प्रदेशसभा निर्वाचनमा होमिएको छ । नेपालीहरुको महान चाड बडा दशैं नजिकै आइसक्दा पनि मानिसहरुको ध्यान चाडबाडमा भन्दा मंसिर ४ गते हुने निर्वाचनमा केन्द्रित छ । कुन नेता कहाँबाट उम्मेदवार होलान् र कसले टिकट पाउँलान् भन्ने चासो र चिन्ता आम जनतामा छ ।
प्रतिनिधिसभा र प्रदेशसभा निर्वाचनको चुनावी रस्साकस्सी चलिरहँदा काठमाडौं क्षेत्र नम्बर १० मा भने नेपाली कांग्रेसका युवा नेता राजेन्द्रकुमार केसी (राजन) ले फरक रुपमा चर्चा बटुलिरहेका छन् । नेपाली कांग्रेसका तर्फबाट एकल सिफारिस भएका राजन केसी लगातार तेस्रो पटक चुनाव जित्दै ह्याट्रिक गर्ने अभियानमा छन् ।
पहिलो पटक २०७० सालको दोस्रो संविधानसभा निर्वाचनमा माओवादी केन्द्रका अध्यक्ष पुष्पकमल दाहाल (प्रचण्ड) लाई हराएर चर्चा बटुलेका केसीले २०७४ को प्रतिनिधिसभा निर्वाचनमा पनि कम्युनिष्ट गठबन्धनलाई पत्तासाफ पारेका थिए । २०६४ को पहिलो संविधानसभा निर्वाचनमा रोल्पा र काठमाडौं क्षेत्र नम्बर १० बाट विजयी हुँदै प्रधानमन्त्री बनिसकेका प्रचण्डलाई केसीले २०७० मा करिब सात हजार मतले पछि पारेका थिए । केसीले २० हजार मत ल्याउँदा प्रचण्डले १३ हजार हाराहारीमा मात्रै भोट पाएका थिए ।
२०७० मा ‘म्यान अफ दी इलेक्सन’ बनेका केसीले २०७४ को प्रतिनिधिसभा निर्वाचनमा गठबन्धनका उम्मेदवार नेकपा माओवादीका नेता हितमान शाक्यलाई पराजित गरेका थिए । करिब एक दशकदेखि सांसद रहेका केसी मंसिर ४ को निर्वाचनमा पनि सहज जित निकाल्दै ह्याट्रिक गर्ने अभियानमा छन् । २०७४ को निर्वाचनमा केसीले २४ हजार १९० भोट पाउँदा उनका निकटतम प्रतिस्पर्धी शाक्यले २१ हजार ९०७ मत पाएका थिए ।
विद्यार्थी संगठनबाट राजनीतिमा
विद्यार्थीकालदेखि नै राजनीतिमा लागेका केसी २०४६ सालबाट नेपाली कांग्रेसको पूर्णकालीन कार्यकर्ता हुँदै जिल्ला विकास समिति सभापतिसमेत भएर काम गरे । उनी क्षेत्र नम्बर १० को क्षेत्रीय सभापति, महाधिवेशन प्रतिनिधि, महासमिति सदस्य हुँदै पार्टीको १४औं महाधिवेशनबाट केन्द्रीय सदस्य निर्वाचित भएका छन् । निरन्तर जनताका माझमा रहेर काम गरेकै कारण उनी काठमाडौं क्षेत्र नम्बर १० का जनतामाझ लोकप्रिय छन् । पार्टीले पनि एकल उम्मेदवार सिफारिस गरेकाले केसीले टिकट पाउने मात्रै होइन, ढुक्कसँग चुनाव जित्ने अवस्था रहेको स्थानीयको आँकलन छ । सत्ता गठबन्धनको भागबण्डामा पनि काठमाडौं १० कांग्रेसले पाउने सहमति भइसकेको छ । नेपाली कांग्रेसले लगातार जित्दै आएको यस क्षेत्रको जनमत पनि कांग्रेसकै पक्षमा रहेकाले पहिलेभन्दा यस पटक उनलाई चुनाव जित्न सहज हुने आँकलन गरिएको छ ।
तीन वटै नगरपालिकामा कांग्रेस नेतृत्व
काठमाडौं क्षेत्रन नम्बर १० मा पर्ने दक्षिणकाली, कीर्तिपुर र चन्द्रागिरी तीन वटै नगरपालिकामा कांग्रेस नेतृत्व छ । चार महिनाअघि सम्पन्न स्थानीय तहको निर्वाचनमा तीन वटै नगरपालिकामा कांग्रेसले अत्याधिक मतसहित जित हासिल गरेको थियो । यहाँका तीन वटै नगरपालिकाको सम्भावना पहिचान गरेर काम गरेकै कारण काठमाडौं क्षेत्र नम्बर १० मा उनको विकल्प अहिलेसम्म देखिएको स्थानीय बताउँछन् ।
एमाले उम्मेदवार टुङ्ग्याउनै महाभारत
गठबन्धनको मुख्य प्रतिस्पर्धी नेकपा एमालेले काठमाडौं १० बाट पाँच जनाको नाम सिफारिस गरेको छ । सिफारिस गरिएकामा अधिकांश नयाँ अनुहार छन् । उनीहरुमध्ये यस क्षेत्रबाट कसले टिकट पाउँछन् भन्ने टुंगो लाग्न अझै केही समय कुर्नुपर्ने अवस्था छ ।
एमालेले काठमाडौं १० बाट विनोद श्रेष्ठ, रमेश महर्जन, सुरेन्द्र मानन्धर, शम्भुराम महर्जन र शरब महर्जनको नाम सिफारिस गरेको छ ।
