नेपालको सुखद् सुरुवात

काठमाडौं : नेपालले त्रिकोणात्मक टीट्वेन्टी अन्तर्राष्ट्रिय शृंखलामा विजयी सुरुवात गरेको छ । कीर्तिपुरस्थित त्रिवि क्रिकेट मैदानमा सोमबार भएको खेलमा पपुवा न्युगिनीलाई १५ रनले पराजित गर्दै नेपालले सुखद् सुरुवात गरेको हो ।
एक सय ८४ रनको विशाल लक्ष्य पछ्याएको पपुवा न्युगिनीले १९.२ ओभरमा एक सय ६८ रन मात्र बनाउन सक्यो । १२ ओभरमा सात विकेट गुमाएको पपुवा न्युगिनीलाई नोरमन भानुअले आक्रामक ब्याटिङ गर्दै जित नजिक पु¥याएका थिए । उनी १८औं ओभरको अन्तिम बलमा पेभेलिएन फर्किएपछि नेपालले जित सुनिश्चित गरेको हो । नोरमनले २९ बलमा ५२ रनको अर्धशतकीय पालि खेले । यसैगरी सेसे बौउले ३०, चाल्र्स अमिनीले २२, लेगा सिएकाले २१ र चाड सोपरले १३ रन बनाए । नेपालका करण केसी र कप्तान सन्दीप लामिछानेले तीन÷तीन विकेट लिए । यस्तै अविनाश बोहराले दुई तथा सोमपाल कामीले एक विकेट हात पारे ।
यसअघि टस हारेर पहिले ब्याटिङ गरेको नेपालले निर्धारित २० ओभरमा नौ विकेट गुमाएर एक सय ८३ रनको योगफल खडा गरेको थियो । नेपालका आसिफ शेखले सर्वाधिक ४३ रन बनाए । यसैगरी रोहित पौडेलले ३४, आरिफ शेखले ३१, कुशल भुर्तेलले २०, करण केसीले १४ र कुशल मल्लले ११ रन बनाए । पपुवा न्युगिनीका चाल्र्स अमिनी, अलिओ नाओ र चाड सोपरले दुई÷दुई विकेट लिए । यस्तै नोरमन भानुअ र रिले हेकुरेले एक÷एक विकेट हात पारे ।
जितसँगै नेपालले दुई अंक जोडेको छ । नेपाल शीर्ष स्थानमा पनि उक्लिएको छ । नेपालले अब दोस्रो खेलमा बुधबार मलेसियाको सामना गर्नेछ । यसैगरी पपुवा न्युगिनीसँग बिहीबार प्रतिस्पर्धा गर्नेछ । मंगलबार मलेसिया र पपुवा न्युगिनीबीच खेल हुनेछ । त्रिकोणात्मक शृंखलामा नेपाल, पपुवा न्युगिनी र मलेसिया सहभागी छ । जितसँगै नेपालले पपुवा न्युगिनीविरुद्ध एकदिवसीय शृंखलामा बेहोरेको हारको बदला पनि लिएको छ । नेपाललाई स्तब्ध पार्दै पपुवा न्युगिनीले दुई खेलको एकदिवसीय शृंखला २–० ले जितेको थियो ।