नेपालमाला
२७ आश्विन २०७८, बुधबार 
काठमाडौं : माल्दिभ्समा जारी साफ च्याम्पियनसिप फुटबलअन्तर्गत राउन्ड रोबिन लिगको अन्तिम खेलमा नेपालले आज बंगलादेशको सामना गर्दैछ । माल्दिभ्सको राजधानी मालेस्थित राष्ट्रिय रंगशालामा नेपाल र बंगलादेशबीचको खेल दिउँसो ४ः४५ बजे सुरु हुनेछ ।
बंगलादेशविरुद्ध मैदान उत्रँदा नेपाल ऐतिहासिक उपलब्धि प्राप्त गर्ने लक्ष्यमा हुनेछ । नेपालले अहिलेसम्म साफ च्याम्पियनसिपको फाइनल यात्रा तय गर्न सकेको छैन । बंगलादेशविरुद्ध बराबरी वा जितको नतिजाले नेपाल पहिलो पटक साफ फुटबलको फाइनलमा पुग्नेछ । साफ फुटबलमा नेपालले अहिलेसम्म सेमिफाइनलसम्मको मात्रै यात्रा तय गरेको छ ।
नेपाली टोलीका सहायक प्रशिक्षक किरण श्रेष्ठले बंगलादेशविरुद्ध जितकै लागि खेल्ने बताएका छन् । ‘बंगलादेशविरुद्ध खेल्न हामीले सम्पूर्ण तयारी गरिसकेका छौं । हाम्रा खेलाडी उच्च मनोबल लिएर बंगलादेशसँग मैदान उत्रिने छन्’, प्रशिक्षक श्रेष्ठले भने, ‘फाइनल प्रवेशका लागि टोलीले उत्कृष्ट नतिजा निकाल्ने छ ।’
राउन्ड रोबिन लिगको आधारमा जारी प्रतियोगिताको शीर्ष दुई टोलीले फाइनलमा स्थान बनाउने छन् । साफ फुटबलमा नेपाल तीन खेलमा ६ अंक जोडेर शीर्ष स्थानमा छ । नेपाललाई फाइनल पुग्न कम्तीमा एक अंक भए पुग्छ । नेपालले सुरुवाती दुई खेलमा लगातार जित निकालेको थियो । माल्दिभ्सलाई १–० गोलले पराजित गरेको नेपालले श्रीलंकालाई ३–२ गोलले पाखा लगाएको थियो । आइतबार राति भारतसँगको खेलमा भने नेपाल १–० गोलले पराजित भएको थियो ।
त्यसैले बुधबार नेपाल बंगलादेशलाई हराउने योजनासहित मैदान उत्रनेछ । यसैगरी बंगलादेश पनि नेपाललाई पराजित गर्दै फाइनल पुग्ने योजनामा छ । बंगलादेशले तीन खेलमा चार अंक जोडेको छ । तालिकामा बंगलादेश चौथो स्थानमा छ ।
समूहमा आयोजक माल्दिभ्सले पनि तीन खेलमा ६ अंक जोडेर दोस्रो स्थानमा रहेको छ । नेपालसँग पराजित माल्दिभ्स हेड टु हेडमा पछि रहेको हो । भारत तीन खेलमा ५ अंक जोडेर तेस्रो स्थानमा छ ।
बुधबार राति भारतले माल्दिभ्सविरुद्ध प्रतिस्पर्धा गर्नेछ । दुवै टोली जित निकाल्दै फाइनल पुग्ने योजनामा छन् । फाइनलका लागि माल्दिभ्सलाई बराबरी गरे पुग्नेछ भने भारतलाई भने जितको विकल्प छैन । पाँच राष्ट्र सहभागी च्याम्पियनसिपबाट श्रीलंका बाहिरिसकेको छ । श्रीलंकाले चार खेलमा एक अंक मात्रै जोडेको छ ।
