कुशल भुर्तेल र रोहितकुमार पौडेलको अर्धशतकमा नेपालको प्रभावशाली जित

काठमाडौं : आईसीसी विश्वकप क्रिकेट लिग–२ अन्तर्गत अमेरिकाविरुद्धको खेलमा नेपालले प्रभावशाली जित निकालेको छ । सोमबार राति ओमानको अल अमिरात क्रिकेट मैदानमा भएको खेलमा नेपालले अमेरिकालाई पाँच विकेटले पराजित गरेको हो ।
अमेरिकाले दिएको दुई सय ३१ रनको लक्ष्य नेपालले ४९ ओभरमा पूरा गरेको थियो । नेपालको जितमा प्रारम्भिक ब्याट्सम्यान कुशल भुर्तेल र रोहितकुमार पौडेलले प्रभावशाली प्रदर्शन गरे । आक्रामक ब्याटिङ गरेका भुर्तेलले ८४ रन बनाए । ९३ बलको सामना गरेका कुशल भुर्तेलले तीन छक्का र तीन चौका हिर्काए । यसैगरी रोहितले ८७ बलमा तीन छक्का र दुई चौकाको मद्दतमा ६२ रन बनाए । यस्तै विनोद भण्डारीले ३७, आसिफ सेखले २३ र कप्तान ज्ञानेन्द्र मल्लले १७ रन बनाए । अमेरिकाका निसर्ग पटेल र नोथुसा केजिंगेले दुई÷दुई विकेट लिए । यस्तै गौरभ नेत्रभाल्करले एक विकेट हात पारे ।
यसअघि टस जितेर पहिले ब्याटिङ गरेको अमेरिकाले ५० ओभरमा नौ विकेट गुमाएर दुई सय ३० रनको योगफल खडा गरेको थियो । अमेरिकाका मोनाङ्क पटेलले शतकीय पालि खेलेका थिए । एक सय १३ बलको सामना गरेका उनले एक छक्का र नौ चौकाको मद्दतमा एक सय रन बनाए । यसैगरी निसर्ग पटेलले २१, सुशान्त मोदानी र करिमा गोरेले समान १६, सञ्जय कृष्णमुर्थी, अभिषेक परादकर एवं नोथुसा केजिंगेले समान १३ रन बनाए ।
नेपालका सन्दीप लामिछाने, विक्रम सोब र सुशन भारीले दुई÷दुई विकेट लिए । यस्तै कुशल मल्लले एक विकेट हात पारे ।
आईसीसी विश्वकप क्रिकेट लिग–२ अन्तर्गत नै नेपालले यसअघि घरेलु मैदानमा ओमान र अमेरिकासँग चार खेल खेलेको थियो । अमेरिकासँगको दुवै खेलमा नेपालले जित निकालेको थियो । यसैगरी ओमानसँगको दुवै खेलमा नेपाल पराजित भएको थियो । लिगमा नेपालले चार खेलमा चार अंक जोडेको छ । नेपाल तालिकाको छैटौं स्थानमा छ । ओमान १० खेलमा १६ अंक जोड्दै शीर्ष स्थानमा रहँदा १२ खेलमा १२ अंक जोडेको अमेरिका दोस्रो स्थानमा छ ।
नेपालले दोस्रो खेलमा मंगलबार ओमानसँग प्रतिस्पर्धा गर्नेछ । नेपालले तेस्रो खेलमा अमेरिकासँग शुक्रबार प्रतिस्पर्धा गर्नेछ भने आफ्नो अन्तिम खेलमा आइतबार ओमानको सामना गर्नेछ ।
नेपालले आईसीसी विश्वकप क्रिकेट लिग–२ को तयारीका लागि पपुवा न्युगिनी (पीएनजी) सँग दुई एकदिवसीय अन्तर्राष्ट्रिय शृंखला खेलेको थियो । युवा लेग स्पिनर सन्दीप लामिछानेको प्रभावशाली प्रदर्शनमा नेपालले दुवै खेलमा जित निकालेको थियो ।

0 0 vote
Article Rating

LEAVE A COMMENT

guest
0 Comments
Inline Feedbacks
View all comments