नेपालमाला
१८ भाद्र २०७८, शुक्रबार 
काठमाडौं : कोभिड–१९ संकट व्यवस्थापन केन्द्र (सीसीएमसी)ले लकडाउन हटे पनि अनावश्यक भिडभाड नगर्न आग्रह गरेको छ । कोरोना संक्रमणको जोखिम कायमै रहेकाले भिडभाड नगर्न तथा जोखिम हुने स्थानमा सकेसम्म नजान अनुरोध गरेको छ ।
‘लकडाउन अथवा निषेधाज्ञा रहँदा वा हटे पनि कोरोना संक्रमणको जोखिम कायम छ । त्यसैले सतर्क रहौं’, सीसीएमसीले भनेको छ, ‘कोरोना भाइरस सजिलै सर्ने अवस्थाहरुबाट बचौं ।’
भिडभाड हुने स्थान जहाँ धेरै मान्छे जम्मा भएका हुन्छन्, भौतिक दूरी कम हुने स्थान जहाँ नजिक बसेर वार्तालाप गर्नुपर्ने हुन्छ र भेन्टिलेशन नभएको वा दोहोरो हावा नचल्ने स्थानमा कोरोना संक्रमणको सम्भावना धेरै हुने भएकाले यस्ता ठाउँमा रहँदा वा बस्दा सचेत हुनुपर्ने सीसीएमसीले जनाएको छ ।
‘भिडभाड हुने स्थान, भौतिक दूरी कम हुने स्थान र भेन्टिलेशन नभएको स्थान यी तीनवटै अवस्थाको मिलाप हुने स्थानमा कोरोना संक्रमणको जोखिम उच्च हुन्छ त्यसैले यस्ता स्थानबाट टाढा रहनुपर्छ’, सीसीएमसीले भनेको छ, ‘भिडभाड हुने स्थानमा नजाऔं, सार्वजनिक स्थानमा कम्तीमा दुई मिटर भौतिक दूरी कायम गरौं । साँघुरो स्थानमा सकेसम्म दूरी कायम गरौं, कम समय व्यतित गरौं ।’
पर्याप्त दोहोरो हावा प्रवाह हुने स्थानमा बस्न, सँधैं साबुन पानीले हात धुन र भौतिक दूरी कायम गर्न तथा झ्याल ढोका खुला राख्न, नाक तथा मुख छोप्न र मास्कको प्रयोग गर्न सीसीएमसीले आग्रह गरेको छ ।
