नेपालमाला
१३ श्रावण २०७८, बुधबार 
काठमाडौं : सरकारले बालबालिकाका लागि खोप तयार नभइसकेका कारण कोरोना संक्रमणको जोखिम रहेको बताएको छ । खोप लगाउन नपाएका बालबालिका अब आउन सक्ने कोरोना संक्रमणको तेस्रो लहरको उच्च जोखिममा पर्न सक्ने सरकारले जनाएको छ ।
‘कतिपय विकसित मुलुकमा बालबालिका मात्र खोप लगाउन बाँकी भएकाले उनीहरु बढी प्रभावित हुन सक्ने भनिएको छ’, स्वास्थ्य तथा जनसंख्या मन्त्रालयले भनेको छ, ‘तर, नेपालमा अहिलेसम्म पनि अधिकांशले खोप नपाएकाले गम्भीर संक्रमण हुने जोखिम बालबालिकासहित खोप नलगाएका सबै व्यक्तिहरुलाई उत्तिकै छ ।’
त्यसैल सबै उमेर समूहकाले जनस्वास्थ्यका मापदण्डहरुको पालना गर्न छाड्न नहुने मन्त्रालयले जनाएको छ । कोरोना संक्रमणबाट बच्न जनस्वास्थ्यका सबै मापदण्डको पालना गर्न मन्त्रालयको आग्रह छ ।
हालसम्म भएका अध्ययनहरुले कोभिड–१९ को खोप लगाएका व्यक्तिहरुलाई संक्रमण भइहाले पनि गम्भीर बिरामी पर्ने वा मृत्यु हुने जोखिम निकै कम हुने देखाएकाले आफ्नो पालोमा खोप लगाउन पनि मन्त्रालयले आग्रह गर्दै आएको छ ।
सरुवा रोग विशेषज्ञ डा. शेरबहादुर पुन बच्चालाई नै भनेर कोरोना संक्रमणको तेस्रो लहर आउछ भन्ने नहुने तर बच्चाहरुले खोप नलगाएका कारण उनीहरु बढी जोखिममा पर्ने बताउँछन् ।
“बच्चाहरुका लागि कोरोनाविरुद्धको खोप आइसकेको छैन । त्यसैले अरुले खोप लगाएर सुरक्षित भएको अवस्थामा बच्चाहरुले खोप लगाउन नपाएका कारण उनीहरुमा संक्रमण धेरै देखिन सक्छ,” उनी भन्छन्, “त्यसैले बच्चाहरुलाई कोरोना संक्रमणबाट जोगाउने राम्रो उपाय अथवा संक्रमण हुन नदिन अभिभावकले नै खोप लगाएर सुरक्षित हुनुपर्छ ।”
जति बढी अभिभावक कोरोनाविरुद्धको खोप लगाएर सुरक्षित हुन्छन् त्यति नै बच्चालाई कोरोना संक्रमणको जोखिम पनि कम हुने उनको तर्क छ । त्यसैले यदि कोरोना संक्रमणको तेस्रो लहर आएको अवस्थामा बच्चा सबैभन्दा धेरै प्रभावित हुनसक्ने भनिएको डा. पुन बताउँछन् ।
