युरोकप फुटबल : सेमिफाइनल समीकरण पूरा

रोम : युरोपियन च्याम्पियनसिप (युरोकप) फुटबलको सेमिफाइनल समीकरण पूरा भएको छ । शनिबार राति अन्तिम दुई क्वार्टरफाइनल खेलपछि सेमिफाइनलमा पुग्ने चारवटै टोलीको टुंगो लागेको हो ।
शनिबार रातिको खेलमा डेनमार्कले चेक रिपब्लिकलाई २–१ र इङ्ल्यान्डले युक्रेनलाई ४–० गोलले पराजित गर्दै सेमिफाइनलमा स्थान बनाएका हुन् । सेमिफाइनलमा यी दुई टोलीले नै प्रतिस्पर्धा गर्नेछन् । अर्को सेमिफाइनलमा इटली र स्पेन भिड्ने छन् । इङ्ल्यान्ड बाहेक बाँकी तीन वटै टोली युरोकपका पूर्वविजेता हुन् । इटली र स्पेनबीचको खेल मंगलबार हुनेछ । यस्तै इङ्ल्यान्ड र डेनमार्कले बुधबार प्रतिस्पर्धा गर्ने छन् । दुवै खेल बेलायतको लन्डनस्थित वेम्बली स्टेडियममा हुनेछ । फाइनल खेल पनि यही रंगशालामा आगामी आइतबार हुनेछ ।

इङ्ल्यान्ड २५ वर्षपछि सेमिफाइनलमा

इङ्ल्यान्ड २५ वर्षपछि युरोकप फुटबलको सेमिफाइनलमा प्रवेश गरेको छ । शनिबार राति भएको अन्तिम क्वार्टरफाइनलमा युक्रेनलाई ४–० ले पराजित गर्दै इङ्ल्यान्डले अन्तिम चारमा स्थान बनाएको हो ।
सन १९९६ मा पछिल्लो पटक इङ्ल्यान्डले युरोकपको सेमिफाइनल खेलेको थियो । त्यो बेला जर्मनीसँग पेनाल्टीमा पराजित भएको इङ्ल्यान्डले साढे दुई दशकपछि फेरि सेमिफाइनलमा स्थान बनाएको हो ।
इटालीको रोमस्थित स्टाडियो ओलम्पिको स्टेडियममा भएको खेलमा इङ्ल्यान्डलाई जित दलाउन कप्तान हेरी केनले दुई गोल गरे । यसैगरी हेरी मग्वाएर र जोर्डन हेन्डरसनले एक÷एक गोल गरेका थिए ।
खेलको चौथो मिनेटमै कप्तान केनले गोल गर्दै इङ्ल्यान्डलाई सुरुवाती अग्रता दिलाएका थिए । पहिलो हाफमा त्यही अग्रता कायम राखेको इङ्ल्यान्डले दोस्रो हाफमा तीन गोल थपेकोे थियो । खेलको ४६औं मिनेटमा मग्वाएरले गोल गर्दै अग्रता दोब्बर बनाए । ५०औं मिनेटमा केनले व्यक्तिगत दोस्रो गोल गर्दा हेन्डरसनले ६३औं मिनेटमा गोल गर्दै इङ्ल्यान्डलाई फराकिलो जित दिलाएका थिए । पहिलो पटक क्वार्टरफाइनल पुगेको युक्रेनको यात्रा त्योभन्दा अघि बढ्न सकेन । इङ्ल्यान्डले अब फाइनल प्रवेशका लागि डेनमार्कको सामना गर्नेछ ।

चेक रिपब्लिकलाई पराजित गर्दै डेनमार्कले पनि शनिबार नै सेमिफाइनलमा स्थान बनाएको थियो । अजरबैजानको बाकु ओलम्पिक स्टेडियममा शनिबार भएको क्वार्टरफाइनलमा चेक रिपब्लिकलाई २–१ गोलले पराजित गर्दै डेनमार्कले अन्तिम चारमा स्थान पक्का गरेको हो । डेनमार्कलाई जित दिलाउन थोमस डिलाने र कास्पर डोलवर्गले एक÷एक गोल गरेका थिए । चेक रिपब्लिकका प्याट्रिक सिकले एक गोल फर्काएका थिए ।
खेलको पाँचौं मिनेटमा थोमसले गोल गर्दै डेनमार्कलाई सुरुवाती अग्रता दिलाएका थिए । लार्सेनको कर्नरमा अनमार्क रहेका उनले हेड गोल गरेका थिए । खेलको ४२औं मिनेटमा युवा स्ट्राइकर डोलबर्गले गोल गर्दै डेनमार्कलाई २–० को अग्रता दिलाएका थिए । उनले जोकिम माहेलको पासमा गोल गरेका थिए । दोस्रो हाफमा चेक रिपब्लिकले एक गोल फर्कायो । ४९औं मिनेटमा सिकले गोल गर्दै चेक रिपब्लिकलाई खेलमा फर्काउने कोसिस गरेका थिए । तर, त्यसपछिको लगातारको आक्रमणमा डेनमार्कको रक्षापंक्ति बाधक बनेपछि चेक रिपब्लिक अन्तिम आठबाटै घर फर्किन बाध्य भयो । डेनमार्कविरुद्धको गोलसँगै प्याट्रिक सिकले जारी युरोकपमा पाँच गोल पूरा गरेका छन् । यससँगै प्याट्रिक सिकले गोल्डेन बुटको दाबेदारमा क्रिस्टियानो रोनाल्डोसँगै बराबरी गरेका छन् । पोर्चुगिज फरवार्ड रोनाल्डोले पनि पाँच गोल नै गरेका छन् ।
डेनमार्क सन् १९९२ पछि पहिलो पटक सेमिफाइनलमा प्रवेश गरेको हो । यसअघि चेक रिपब्लिकले प्रिक्वार्टरफाइनलमा उपाधि दाबेदार मानिएको नेदरल्यान्ड्सलाई २–० गोलले पराजित गरेको थियो । डेनमार्कले भने अन्तिम १६ मा वेल्सलाई ४–० गोलले पराजित गरेको थियो ।