नेपालमाला
८ असार २०७८, मंगलवार 
रियो दी जेनेरियो : अर्जेन्टिना कोपा अमेरिका फुटबलको क्वार्टरफाइनलमा प्रवेश गरेको छ । मंगलबार बिहान भएको खेलमा पराग्वेलाई १–० गोलले पराजित गर्दै अर्जेन्टिनाले अन्तिम आठको यात्रा तय गरेको हो ।
ब्रासिलियामा मंगलबार बिहान भएको खेलको पहिलो हाफमा एलेसान्द्रो गोमेजले गरेको गोल नै अर्जेन्टिनाको जितमा निर्णायक बन्यो । खेलको १०औं मिनेटमा एलेसान्द्रो गोमेजको गोलबाट अर्जेन्टिनाले अग्रता लिएको थियो । एञ्जल डी मारियाले उपलब्ध गराएको बलमा गोमेजले सुन्दर गोल गरेका थिए ।
जितपछि अर्जेन्टिना समूह ‘ए’ मा तीन खेलबाट सात अंक जोडेर शीर्षस्थानमा रहेको छ । पराजित पाराग्वे तीन अंक जोडेर तेस्रो स्थानमा रहेको छ । चिली तीन खेलबाट पाँच अंक जोडेर दोस्रो स्थानमा रहँदा उरुग्वे दुई खेलबाट एक अंक जोडेर चौथो स्थानमा छ । अंकविहीन बोलिभिया पुछारमा छ । अर्जेन्टिनाले अन्तिम खेलमा बोलिभियाको सामना गर्नेछ ।
