नेपालमाला
१४ जेष्ठ २०७८, शुक्रबार 
काठमाडौं : नेपालकी सुटिङ खेलाडी कल्पना परियारले दुई महिनापछि जापानमा सुरु हुने टोकियो ओलम्पिकको ‘वाइल्ड कार्ड’ पक्का गरेकी छन् । नेपाल सुटिङ संघका अध्यक्ष पुष्पदास श्रेष्ठले कल्पनाले वाइल्ड कार्ड पाउने पक्का भएको जानकारी दिए । ‘कल्पनाको वाइल्ड कार्ड पक्का भएको छ’ उनले भने, ‘नेपाल ओलम्पिक कमिटी र सुटिङ संघको प्रयास सार्थक भएको छ ।’
कल्पनासँगै प्रशिक्षणमा रहेकी सुस्मिता नेपालले पनि वाइल्ड कार्ड पाउने सम्भावना रहेको श्रेष्ठले बताए । क्रोएसियाको जागरेभमा सुटिङको वल्र्ड कप चलिरहेको र उक्त प्रतियोगिताका पहिलो, दोस्रो र तेस्रो स्थान हासिल गर्ने खेलाडीको अंक सुस्मिताको भन्दा कम भएमा उनले पनि ओलम्पिकमा सहभागी हुन पाउने अध्यक्ष श्रेष्ठले जानकारी दिए । उनका अनुसार त्यसको निर्णय भने जुन ८ मा मात्र हुनेछ ।
दोहामा भएको ओलम्पिक क्वालिफायरमा सहभागी कल्पनाले ६१४.९ अंक जोडेकी थिइन् । उक्त प्रतियोगितामा सुस्मिताले ६०५ अंक जोडेकी थिइन् । ओलम्पिकमा कल्पनाले १० मिटर एयर राइफलमा प्रतिस्पर्धा गर्ने छिन् । कल्पना र सुस्मिता सातदोबाटोस्थित सुटिङ रेन्जमा प्रशिक्षणरत छन् । उनीहरूलाई असिम यादवले प्रशिक्षण दिइरहेका छन् ।
कल्पनासँगै टोकियो ओलम्पिकमा चार जना नेपाली खेलाडीको सहभागिता सुनिश्चित भएको छ । यसअघि पौडीका गौरिका सिंह र एलेक्स शाह तथा एथलेटिक्सका गोपीचन्द्र पार्कीले टोकियो ओलम्पिक सहभागिता सुनिश्चित गरिसकेका छन् । टोकियो ओलम्पिक जुलाई २३ देखि अगस्ट ८ सम्म आयोजना हुँदैछ ।
