नेपालमाला
२० बैशाख २०७८, मंगलवार 
काठमाडौं : चर्चित फ्रेन्चाइज क्रिकेट लिग इन्डियन प्रिमियर लिग (आईपीएल) निलम्बनमा परेको छ । विभिन्न टोलीका खेलाडी र अफिसियलमा कोरोना भाइरसको संक्रमण देखिएपछि भारतीय क्रिकेट कन्ट्रोल बोर्ड (बीसीसीआई) ले आईपीएल २०२१ लाई निलम्बन गरेको हो ।
बीसीसीआईका उपाध्यक्ष राजीव शुक्लले यो सिजनका लागि आईपीएल निलम्बन गरेको जनाएका छन् । उनले कोरोना कहरका कारण चर्चित टीट्वान्टी क्रिकेट लिग निलम्बन गर्नुपर्दा दुःख लागेको बताएका छन् । आईपीएलका अध्यक्ष बृजेश पटेलले हालको अवस्थामा प्रतियोगितालाई निलम्बन गरे पनि पछि अनुकुल समयमा फेरि निरन्तरता दिन सकिने बताए । ‘अहिलेको अवस्था प्रतिकुल रह्यो । यो अवस्थामा बाँकी खेल सञ्चालन गर्न सक्ने अवस्था रहेन’, उनले भने, ‘समय अनुकल भएमा पछि यसलाई निरन्तरता दिन पनि सकिने छ ।’
बीसीसीआईले प्रतियोगिता सुरु हुनु अघि सबै सुरक्षा मापदण्ड अपनाएको र ‘बायो बबल्स’ मजबुद रहेको दाबी गरेको थियो । तर, त्यसका बाबजुद पनि प्रतियोगिताको २९ वटा खेल मात्र सञ्चालन हुन सक्यो ।
चेन्नई सुपर किङ्सका लक्ष्मीपथि बालाजी, सनराइजर्स हैदरावादका ऋद्धिमान साह, कोलकाता नाइट राइडर्सका बरुण चक्रवर्ती र सन्दीप वारियर तथा दिल्ली क्यापिटल्सका अमित मिश्रालाई कोरोना संक्रमण भएको थियो ।
