नेपालमाला
१२ बैशाख २०७८, आईतवार 
काठमाडौं : बुटवल लुम्बिनी एफसीले पहिलो संस्करणको नेपाल सुपर लिग (एनएसएल) फुटबल प्रतियोगितामा विजयी सुरुवात गरेको छ । आइतबार भएको खेलमा पोखरा थन्डर्स एफसीलाई २-0 गोल अन्तरले पराजित गर्दै बुटवल लुम्बिनीले सुखद सुरुवात गरेको हो ।
त्रिपुरेश्वरस्थित दशरथ रंगशालामा बुटवललाई जित दिलाउन अर्मान्ड बेडुमले एक गोल गरे । यस्तै बुटवलले एक गोल आत्मघाती उपहार पाएको थियो । खेलको दोस्रो मिनेटमा बुटवलका फरवार्ड अर्मान्ड बेडुमले गोलको सुनौलो मौका गुमाए । गोलकिपर तथा कप्तान विशाल राईको लामो पासमा पेनाल्टी बक्स भित्रबाटको उनको फितलो प्रहार पोखराका गोलकिपर दीप कार्कीले बचाए ।
खेलको २३ औं मिनेटमा पोखराका कप्तान नवयुग श्रेष्ठको पेनाल्टी बक्स बाहिरबाटको प्रहार पोस्ट नजिकबाट बाहिरिएको थियो । २५ औं मिनेटमा पोखराका नितिन थापाको पेनाल्टी बक्स भित्रबाटको प्रहारले पनि पोस्टको दिशा लिन सकेन । खेलको २८ औं मिनेटमा पोखराका राजेशको उत्कृष्ट फ्रिकिक पोस्टको केहि इन्चमाथिबाट गएको थियो । बुटवलका रबिन श्रेष्ठले रबि पासवानलाई फउल गरेपछि पोखराले फ्रिकिकको मौका पाएको थियो । खेलको ४२ औं मिनेटमा अर्मान्ड बेडुमले गोल गर्दै बुटवललाई १-० को अग्रता दिलाए ।
मान बहादुर परियारको लामो फ्रिकिकमा अर्मान्डको हेडर पोखराका डिफेन्डर अजित भण्डारीलाई लाग्दै गोल भएको थियो । खेलको ५८ औं मिनेटमा बुटवलका लक्षण रुचालको पेनाल्टी बक्स भित्रबाट प्रहार गरेको सशक्त प्रहार पोखराका गोलकिपर दीप कार्कीले उत्कृष्ट बचाउ गरे ।खेलको ६६ औं मिनेटमा लक्षण रुचालको पासमा सुमन लामाको डिबक्स बाहिरबाटको सशक्त प्रहार पोस्ट बारमा लागेर फर्किदा बुटवल अग्रता दोब्बर बनाउन चुकेको थियो ।
७२ औं मिनेटमा पोखराका राफायल रिमगागोको पेनाल्टी क्षेत्रको ठिक बाहिरबाट प्रहार गरेको बल पोस्ट बारको केहि माथिबाट गएको थियो ।खेलको ७५ औं मिनेटमा पोखराका मौसा अब्बाको फ्री हेडरले पोस्टको दिशा लिन सकेन । त्यसपछि खेलको ७६ औं मिनेटमा पोखराका अजित भण्डारीले आत्मघाती गोल गरे । अमिर श्रेष्ठको क्रस क्लियर गर्ने क्रममा अजितले आफ्नै पोस्टमा गोल गरेका थिए । खेलको इन्जुरी समयमा बुटवलका विलियम ओपोकुको फ्रिकिक पोस्ट बारमा लागेर फर्किएको थियो । खेलको म्यान अफ दि म्याच बुटवलका अर्मान्ड चुनिए । उनले २५ हजार प्राप्त गरे । खेलको प्रोमोसिङ प्लेयर अफ दि म्याच बुटवलका आमिर श्रेष्ठ चुनिए । उनले १० हजार हजार प्राप्त गरे । यस जितसँगै बुटवलले पहिलो खेलमा ३ अंक जोडेको छ । पोखराले भने हारबाट प्रतियोगिताको सुरुवात गरेको छ ।
प्रतियोगिता अन्तर्गत सोमबार ९भोलि० एक खेल हुनेछ । सोमबार ललितपुर सिटी एफसी र एफसी चितवनबीच प्रतिस्पर्धा हुनेछ ।
