सुपर लिगमा जोडियो ‘पे वेल’

काठमाडौं : फ्रेन्चाइज फुटबल प्रतियोगिता नेपाल सुपर लिग (एनएसएल) को टिकेटिङ पार्टनरका रुपमा ‘पे वेल’ जोडिएको छ । नेपाल स्पोर्ट्स म्यानेजमेन्टले बुधबार टिकेटिङ पार्टनरका रुपमा पे वेल प्रालिसँग सम्झौता गरेको छ ।
नेपाल स्पोर्ट्स म्यानेजमेन्टकी अध्यक्ष आश्रेता कार्की चौधरी र पे वेलका अध्यक्ष भीमप्रसाद तिमल्सिनाले सम्झौता पत्रमा हस्ताक्षर गरे । सम्झौता अनुसार एनएसएलको सम्पूर्ण टिकट विक्री पे वेलबाट हुनेछ ।
पे वेल प्रालिका अध्यक्ष तिमल्सिनाले एनएसएलसँग जोडिन पाउँदा खुसी लागेको बताए । ‘एनएसएलसँग जोडिन पाउँदा खुसी छौं’, उनले भने, ‘नेपाल सरकारको डिजिटल कन्सेप्टलाई आत्मसाथ गरेर अगाडि बढेका छौँ ।’
पहिलो संस्करणको लिगमा सात फ्रेन्चाइज टोलीको सहभागिता रहेको छ । लिगमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी छन् । त्रिपुरेश्वरस्थित दशरथ रंगशालामा हुने लिग बैशाख ११ गतेदेखि २५ गतेसम्म सञ्चालन हुनेछ । अखिल नेपाल फुटबल संघ (एन्फा) को प्राविधिक सहयोगमा हुने लिग राउन्ड रोबिनका आधारमा सञ्चालन हुनेछ ।