नेपालमाला
१० चैत्र २०७७, मंगलवार 
काठमाडौं : बंगलादेशले त्रिदेशीय अन्तर्राष्ट्रिय फुटबल प्रतियोगितामा विजयी सुरुआत गरेको छ । दशरथ रंगशालामा मंगलबार भएको उद्घाटन खेलमा बंगलादेशले किर्गिस्तानको यू–२३ ओलम्पिक टोलीलाई १–० गोलले हरायो ।
प्रतिस्पर्धात्मक खेलमा बंगलादेशले किर्गिस्तानको आत्मघाती गोलको सहयोगमा जित निकालेको हो । ३०औं मिनेटमा बंगलादेशका महमद सद उद्धिनको प्रहार बचाउने क्रममा किर्गिस्तानका कुमारबज उल्लु बइमानको प्रहार आफ्नै पोस्ट्का छिरेको थियो ।
आत्मघाती गोलपछि निरास देखिएको किर्गिस्तानी युवा टोलीले दोस्रो हाफमा खासै प्रभाव जमाउन सकेन । खेलको अन्तिममा आक्रामक देखिएको किर्गिस्तानले सुन्दर अवसर खेर फालेको थियो । इन्जुरी समयमा जापारोभ अमिरको कर्नर पासमा तासिभ कामोलिदिनको पोस्ट् नजिकको अनमार्क हेड प्रहार बाहिरिएपछि किर्गिस्तान हार खेप्न बाध्य बन्यो ।
दोस्रो हाफका केही रक्षात्मक देखिएको बंगलादेशले पनि दुई वटा राम्रा अवसर खेर फालेको थियो । बंगलादेशका कप्तान सोहेल राना म्यान अफ दी म्याच घोषित भए । उनले दुई सय ५० अमेरिकी डलर पुरस्कार पाए ।
खेलपछि बंगलादेशका प्रशिक्षक जेमी डेले खेलाडीको प्रदर्शनबाट खुसी रहेको बताए । ‘खेल राम्रो थियो । अवसर बनाए पनि गोल भएन । नजितामा सन्तुष्ट छौं’, उनले भने । किर्गिस्तानका प्रशिक्षक झोल्डोसोभ नुर्बेकले राम्रो तयारी गर्न नपाएका कारण युवा खेलाडीले खेल्न नसकेको बताए ।
प्रतियोगितामा आयोजक नेपालसहित बंगलादेश र किर्गिस्तान सहभागी छन् । अखिल नेपाल फुटबल संघ (एन्फा) ले सन् २०२२ मा कतारमा आयोजना हुने विश्वकप छनोट खेलको तयारीका लागि त्रिदेशीय अन्तर्राष्ट्रिय फुटबल प्रतियोगिता आयोजना गरेको हो । नेपालले पहिलो खेल चैत १२ गते किर्तिस्तान र दोस्रो खेल १४ गते बंगलादेशसँग खेल्नेछ ।
राउन्ड रोबिन लिगका आधारमा सञ्चालित प्रतियोगितामा शीर्ष दुई टोली फाइनलमा भिड्नेछन् । प्रतियोगिताको विजेता टोलीले पाँच हजार र उपविजेताले तीन हजार अमेरिकी डलर पुरस्कार प्राप्त गर्नेछन् ।
