मेयर्स कप क्रिकेट : एपीएफ फाइनलमा

काठमाडौं : विभागीय टोली एपीएफ क्लब काठमाडौं मेयर्स कप एकदिवसीय पुरुष क्रिकेट प्रतियोगिताको फाइनलमा प्रवेश गरेको छ । बिहीबार भएको लिग चरणको अन्तिम खेलमा काठमाडौं मेयर–११ लाई सात विकेटले पराजित गर्दै एपीएफ उपाधि नजिक पुगेको हो । एपीएफले फाइनलमा अर्को विभागीय टोली नेपाल पुलिस क्लबसँग शनिबार खेल्नेछ ।
मूलपानी क्रिकेट मैदानमा काठमाडौंले दिएको एक सय ७८ रनको लक्ष्य एपीएफले ४४.१ ओभरमा तीन विकेट गुमाएर पूरा गरेको थियो । एपीएफको जितमा सन्दीप जोरा र कप्तान शरद भेषावकरले अर्धशतकीय पालि खेले । शरदले अविजित ६१ रन बनाउँदा सन्दीपले ६२ रन बनाए । यस्तै शंकर रानाले ३१ र भुवन कार्कीले ११ रन बनाए । काठमाडौंका कप्तान सन्दीप लामिछाने, अनुज चुनारा र अनिल खरेलले एक÷एक विकेट लिए ।
यसअघि टस हारेर पहिले ब्याटिङ गरेको काठमाडौंले ४८.५ ओभरमा अलआउट हुँदै एक सय ७८ रनको योगफल खडा गरेको थियो । काठमाडौंका सन्दीप रजालीले सर्वाधिक ४८ रन बनाए । यस्तै हरिशंकर साहले ३६, खड्क बोहराले १३, विक्रम भुसालले २० र कप्तान सन्दीप लामिछानेले ११ बनाए । एपीएफका कमलसिंह ऐरी र अविनाश बोहराले तीन÷तीन विकेट लिए ।
जितसँगै एपीएफले चार खेलमा तीन जितसहित ६ अंक जोड्यो । एपीएफ दोस्रो स्थानमा रहँदै फाइनल पुगेको हो । पुलिसले पनि चार खेलमा तीन जितसहित ६ अंक जोडेर फाइनल पक्का गरेको थियो । पुलिस रन रेटका आधारमा एपीएफभन्दा अघि रहेको हो ।
यसैगरी त्रिवि क्रिकेट मैदान कीर्तिपुरमा भएको खेलमा बागमती प्रदेशले त्रिभुवन आर्मी क्लबलाई १० रनले पराजित ग¥यो । बागमतीले दिएको दुई सय ६७ रनको लक्ष्य पछ्याएको आर्मी ४७.१ ओभरमा दुई सय ५६ रनमै समेटियो । आर्मीका कप्तान विनोद भण्डारीले एक सय १९ रनको शतकीय पालि खेले पनि टोलीलाई जित दिलाउन सकेनन् । आर्मीलाई रोक्न बागमतीका अरियो पौडेलले पाँच विकेट लिए । यस्तै रामनरेश गिरीले दुई तथा नन्दन यादव, सोनु देवकोटा र पारस खड्काले एक÷एक विकेट लिए ।
यसअघि पहिले ब्याटिङ गरेको बागमतीले दुई सय ६६ रनको योगफल खडा गरेको थियो । बागमतीका पारस खड्काले एक सय १९ रनको शतकीय पालि खेलेका थिए ।