नेपालमाला
१ मंसिर २०७७, मंगलवार 
काठमाडौं : सोतो कप इन्टरनेसनल अनलाइन कराते च्याम्पियनसिपमा नेपालका चार खेलाडीले स्वर्ण जितेका छन् । च्याम्पियनसिपमा खेलाडी एवं प्रशिक्षक रवीन्द्र मानन्धर, नीता आचार्य, सञ्जु देसार र मनिष कार्कीले स्वर्ण जितेका हुन् ।
क्यानडा कराते संघको आयोजनामा भएको च्याम्पियनसिपको ४० वर्ष माथिको पुरुष मास्टर्स समूहमा रवीन्द्रले स्वर्ण जिते । उनले २३.५२ अंक जोडे । उनले १५ दिन अघि पनि कराते फिलिपिन्स लिगको आयोजनामा भएको सातौं नासिमुरा कप अनलाइन कराते च्याम्पियनसिपमा पनि स्वर्ण जितेका थिए ।
महिला डिभिजन ३९ अन्तर्गत नीता आचार्यले २४.७२ अंकका साथ स्वर्ण जितिन् । नीताले अक्टोबर ३० र ३१ मा नेसनल कराते अफ ब्राजिलको आयोजनमा भएको अनलाइन कराते वल्र्ड च्याम्पियनसिपमा पनि स्वर्ण हात पारेकी थिइन् । उनले केरला कराते संघको आयोजनामा भएको सद्गुरु मास्टर्सकप च्याम्पियनसिपमा पनि स्वर्ण हात जितेकी थिइन् ।
यसैगरी सञ्जु देसार र मनिष कार्कीले पनि स्वर्ण जोडे । सञ्जुले डिभिजन २७ अन्तर्गत महिला १४–१५ वर्षको स्वर्ण जितिन् । सञ्जुले २३.६२ अंक जोडेकी थिइन् । मनिषले डिभिजन ३० को पुरुष १४–१५ वर्ष प्रतिस्पर्धामा स्वर्ण जिते । मनिषले २४.४६ अंक प्राप्त गरे
डिभिजन एफअन्तर्गत पुरुष ब्लाकबेल्ट इलाइटमा स्वनिम मानन्धर र १६–१७ वर्ष समूहमा प्रनिल मानन्धरले कांस्य जिते । च्याम्पियनसिपमा नौ राष्ट्रको सहभागिता रहेको थियो ।
