नेपालमाला
२६ चैत्र २०७६, बुधबार 
न्युयोर्क : अमेरिकी राष्ट्रपति डोनाल्ड ट्रम्पले विश्व स्वास्थ्य संगठन (डब्लुएचओ)लाई दिँदै आएको कोष रोक्ने चेतावनी दिएका छन् । कोरोना भाइरस नियन्त्रणका लागि डब्लुएचओले उचित भूमिका खेल्न नसकेको भन्दै ट्रम्पले उक्त कोष रोक्ने चेतावनी दिएका हुन् ।
ह्वाइट हाउसमा आयोजित नियमित प्रेस ब्रिफिङको क्रममा उनले डब्लूूएचओलाई कोरोना भाइरसको जोखिम पहिला नै थाहा भएको तर उसले बेलैमा सूचित नगरेको आरोप लगाए । ट्रम्पले यस विषयमा अहिले अनुसन्धान भइरहेको तर आफूहरु डब्लूएचओलाई दिँदै आएको कोष रोक्ने पक्षमा रहेको बताए ।
सन् २०१९ को अन्तिममा यो भाइरस फेला पर्दा डब्लूूएचओले भाइरसलाई ‘पत्ता नलागेको कारणले हुने निमोनिया’ भएको बताएको थियो । जनवरी ३० मा उसले कोरोना भाइरसको कारण विश्वव्यापी स्वास्थ्य आपतकालको घोषणा गरेको थियो भने मार्च ११ मा यसलाई महामारीको संज्ञा दिएको थियो । अमेरिका डब्लूएचओलाई सबैभन्दा धेरै योगदान गर्ने मुलुक हो ।
ट्रम्पले सामाजिक सञ्जाल ट्वीटरमा पनि डब्लुएचओले चीनको पक्ष लिएको आरोप लगाएका थिए । जनवरी ३१ मा डब्लूएचओका प्रतिनिधिले विश्वभरका मुलुकहरुलाई भाइरसको जोखिम हुँदाहुँदै पनि आफ्नो सीमा खुला राख्न सुझाव दिएका थिए । तर, सोही दिन अमेरिकाले चीनबाट आउने पर्यटकमाथि रोक लगाउने निर्णय गरेको थियो ।
