उदयपुरमा १२ जनामा देखियो कोरोना रिपोर्ट पोजेटिभ, चितवनमा दुई जनाको पनि पोजेटिभ

काठमाडौं : उदयपुरमा १२ जनामा कोरोना पोजेटिभ देखिएको छ । त्रियुगा नगरपालिका ३ भुल्केस्थित मस्जिदमा  बसेका १० मध्ये ८ जनाको स्वाब परीक्षण गर्दा कोरोना पोजेटिभ पाइएको हो। अन्य चारजनामा समेत कोरोना पोजेटिभ देखिएको स्वास्थ्य तथा जनसंख्या मन्त्रालयका सचिव यादव कोइरालाले जानकारी दिए ।

भुल्केस्थित मस्जिदमा  केही भारतीय नागरिक बसेको सूचना आएपछि मंगलबार सुरक्षाकर्मीसहित मस्जिद पुगेको स्वस्थ्यकर्मीको टोलीले उनीहरुको स्वाब नमुना लिएको थियो।

उनीहरुको स्वाब परीक्षणका लागि कोशी अस्पताल विराटनगर ल्याइएको थियो। सबैको रिपोर्ट पोजेटिभ भेटिएको र रिपोर्ट मुख्यमन्त्री कार्यालय सँगै केन्द्रमा पठाएको प्रदेश १ को सामाजिक विकास मन्त्रालयले जानकारी दिएको छ।  स्वास्थ्य तथा जनसंख्या मन्त्रालयले भने यसको औपचारिक जानकारी दिएको छैन ।

यसैगरी चितवनको राप्ती नगरपालिका–८ का दुई जनामा पनि कोरोना पोजेटिभ देखिएको छ । उनीहरु बेलायतबाट फर्किएको आमा छोरा रहेको बुझिएको छ । उनीहरु कतार ट्रान्जिट भएर नेपाल आएको र ३ दिन काठमाडौं बसेको बताइएको छ । उनीहरुको भरतपुर अस्पतालको आइसोलेसनमा उपचार भइरहेको छ ।
यससँगै नेपालमा कोरोना संक्रमित व्यक्तिको संख्या ३० पुगेको छ । एक जना भने उपचार पनि निको भइसकेका छन् ।

यसैगरी  र्‍यापीड किट टेष्‍ट (आरडीटी) विधिबाट  कोरोना भाइरस संक्रमण परीक्षण ७५ मा सुरु भएको छ। स्वास्थ्य तथा जनसंख्या मन्त्रालका प्रवक्ता डा. विकास देवकोटाका अनुसार शुक्रबारसम्म ७५ जिल्लामा आरडीटी टेष्ट सुरु भएको हो। अब डोल्पा र सोलुखुम्बुमा भने चाँडै आरडीटी टेष्ट सुरु हुने प्रवक्ता देवकोटाको भनाइ छ।

आरडीटी टेष्ट ७५ जिल्लामा पुग्दा सातै प्रदेशका विभिन्न ठाउँमा गरेर १४ स्थानबाट पोलिमरेज चेन रियाक्सन (पीसीआर) परीक्षण सुरु भएको छ। पीसीआर घाटीको स्वाबको परीक्षण हो। यसको नतिजा आउन ६ घण्टादेखि दुई दिनसम्म लाग्ने चिकित्सकले बताएका छन्। आरडीटी परीक्षणको रिपोर्ट भने १५ मिनेटमै सार्वजनिक गर्न सकिन्छ।

अहिलेसम्म आरडीटी विधिबाट १६ हजार ५ सय ६५ नमुना परीक्षण भएको छ भने पीसीआर विधिबाट सात हजार ६ सय ८८ गरेर ुकल २४ हजार दुई सय ५३ नमुनाको परीक्षण भएको छ।

 

0 0 vote
Article Rating

LEAVE A COMMENT

guest
0 Comments
Inline Feedbacks
View all comments