सनसिटीमा बस्ने सबैको कोरोना परीक्षण सुरु

काठमाडौं : काठमाडौंको पेप्सीकोलास्थित सनसिटी अपार्टमेन्टमा बस्दै आएका सबैको कोरोना संक्रमण परीक्षण सुरु गरिएको छ ।
उक्त अपार्टमेन्टको १५औं तल्लामा बस्दै आएका दुई जना व्यक्तिमा कोरोना संक्रमण पुष्टि भएपछि त्यहाँ बस्ने अन्य व्यक्तिहरुको पनि परीक्षण सुरु गरिएको स्वास्थ्य तथा जनसंख्या मन्त्रालयले जनाएको छ ।
यसैगरी कोरोना संक्रमित व्यक्तिको सम्पर्कमा आएकाहरुको ट्रेसिङ पनि सुरु गरिएको मन्त्रालयले जानकारी दिएको छ ।
पेप्सीकोला टाउन प्लानिङस्थित सनसिटी अपार्टमेन्टमा बेलायतबाट गत चैत ५ गते आएर बसेका एकै परिवारका ५८ वर्षका पुरुष र ८१ वर्षकी महिलामा कोरोना संक्रमण पुष्टि भएको छ । उनीहरुकै परिवारका अर्का एक जनाको पहिलो परीक्षणमा भने पोजेटिभ नदेखिएको मन्त्रालयले जनाएको छ ।
सोमबार कागेश्वरी मनहरा नगरपालिकाले ¥यापिड डाइग्नोस्टिक टेस्ट (आरडीटी) विधिबाट कोरोना संक्रमण परीक्षण गर्दा परिवारका तीनै जनामा कोरोना संक्रमण देखिएपछि उपचारका लागि पाटन अस्पताल लगिएको थियो ।
अहिले उनीहरुको पाटन अस्पतालमा नै उपचार भइरहेको छ । अपार्टमेन्टमा बस्दै आएका व्यक्तिमा कोरोना संक्रमण देखिएपछि सोमबार साँझदेखि नै प्रहरीले अपार्टमेन्ट सिल गरेको छ ।