युरोपका सबै नेपाली सुरक्षित

काठमाडौं : युरोपका विभिन्न मुलुकमा रहेका नेपाली कोरोना भाइरस संक्रमणबाट सुरक्षित रहेका छन्। संक्रमण भइहाले कसरी बच्ने भन्ने चिन्ता रहेको उनीहरूले बताएका छन्। इटालीमा करिब १५ सय नेपाली रहेको अनुमान छ। एनआरएनए इटालीका उपाध्यक्ष छविलाल कँडेलका अनुसार धेरै नेपाली रहेको रोमनजिकका क्षेत्रमा कोरोना प्रभाव न्यून छ। उनले सबैभन्दा बढी प्रभावित लोमबार्दिया क्षेत्रका नेपाली पनि सुरक्षित रहेको बताए।

इटालीमा बुधबार अपराह्नसम्म करिब साढे ६ सय जनाको मृत्यु भएको छ भने १० हजारभन्दा बढीमा संक्रमण भेटिएको छ। चीनपछि सबैभन्दा बढी कोरोना भाइरस प्रभावित मुलुक इटाली हो।

प्रधानमन्त्री जुसेपे कोन्टेले सबै नागरिकलाई आफ्नै घरमा बस्न र यात्रा नगर्न आग्रह गरेपछि ६ करोड जनसंख्या रहेको इटाली पूरै ‘लक–डाउन’ छ। देशभरका सबै शिक्षण संस्था आगामी महिनासम्मका लागि बन्द गरिएका छन्।

फ्रान्स, जर्मनी, डेनमार्कस्थित नेपाली दूतावासले पनि युरोपमा रहेका नेपाली संक्रमित नरहेको स्पष्ट पारेका छन्। अस्ट्रेलियामा नेपालबाट गएका विद्यार्थी संक्रमित भनिएको छ। तर, त्यसबारे केही खुलाइएको छैन। त्यहाँका कुनै नेपालीमा संक्रमण नदेखिएको दूतावासले जानकारी पठाएको छ। खाडीमा पनि नेपाली संक्रमित नदेखिएको बताइएको छ।

चिनियाँ प्रान्त हुपईको वुहानबाट सुरु भएको कोरोना भाइरस सयभन्दा बढी मुलुकमा फैलिएको छ। विभिन्न देशमा गरी ४ हजार ३ सयभन्दा बढीको ज्यान गएको छ। एक लाख २० हजार मानिस संक्रमित भएका छन्। ६७ हजार व्यक्ति उपचारपछि स्वस्थ बनेको तथ्यांक छ।

चीनमा कोरोनाको प्रभाव घट्दै गएको छ। इटाली, दक्षिण कोरिया, इरान, फ्रान्स, स्पेन, जर्मनी र अमेरिकामा संक्रमण फैलिएको छ। डेढ लाखभन्दा बढी नेपाली रहेको बेलायतमा पनि कोरोनाबाट नेपाली संक्रमित बनेको भन्ने समाचार भने अहिलेसम्म आएको छैन ।

0 0 vote
Article Rating

LEAVE A COMMENT

guest
0 Comments
Inline Feedbacks
View all comments