नेपालमाला
२४ माघ २०७६, शुक्रबार 
वुहान : चीनमा कोरोना भाइरस फैलिन सक्ने र त्यसले मानवीय क्षति गर्न सक्ने पहिलो पटक चेतावनी दिएका चिनिया चिकित्सकको कोरोनाकै कारण ज्यान गएको छ। ३४ वर्षीय नेत्र रोग विशेषज्ञ ली वेन्लियाङको भाइरस संक्रमणकै कारण मृत्यु भएको जनाइएको छ ।
वेन्लियाङ वुहान सेन्ट्रल हस्पिटलमा कार्यरत रहेको अन्तर्राष्ट्रिय सञ्चार माध्यमले जनाएका छन्। उनले पहिलो पटक डिसेम्बर ३० मा भाइरस संक्रमण भयावह रूपमा फैलिन सक्ने चेतावनी दिएका थिए। उनले आफ्ना सहपाठी तथा सहकर्मीहरूलाई सार्सजस्तै कोरोना भाइरस पनि फैलिन सक्ने डर भएको सामाजिक सञ्जाल वी च्याटमा बताएका थिए। तर प्रहरीले उनलाई ‘अनर्गल टिप्पणी नगर्न’ सचेत गराएको थियो।
यसभन्दा अघि पनि भाइरस संक्रमितको उपचारमा खटिएका एक चिकित्सकको भाइरस संक्रमणकै कारण ज्यान गएको थियो।
हालसम्म चीनमा भाइरसका कारण ज्यान गुमाउनेको संख्या ६३७ पुगेको चिनियाँ सीजीटीएनले उल्लेख गरेको छ। त्यस्तै १,५४० जना निको भइसकेको समेत उल्लेख गरेको छ भने ३१,२११ जनामा संक्रमण देखिएको बताएको छ।
डाक्टरको मृत्युपछि चीनमा जनस्तरबाटै आक्रोस व्यक्त गरिएको छ । कोरोना भाइरसका बारेमा आम जनतालाई एथेष्ठ जानकारी र सूचना दिनुपर्ने माग उनीहरुले गरेका छन् ।
