संकटाविरुद्ध मनाङको जित

काठमाडौं : साविक विजेता मनाङ मस्र्याङ्दी क्लबले सहिद स्मारक ‘ए’ डिभिजन लिगमा सानदार जित निकालेको छ । सातदोबाटोस्थित एन्फा कम्प्लेक्समा बुधबार भएको खेलमा मनाङले संकटालाई ३–० गोलले हरायो । जितसँगै मनाङ उपाधि रक्षाको बाटोमा लम्किएको छ ।

मनाङको जितमा अञ्जन विष्ट र निशान लिम्बूले गोल गरे । अर्को गोल मनाङले संकटाबाट उपहार पाएको थियो । मनाङले ४२औं मिनेटमा संकटाको आत्मघाती गोल सहयोगमा अग्रता लिएको थियो । मनाङका भिडाल लुयर्सको पासमा अञ्जनको सशक्त हेड प्रहारलाई बचाउने क्रममा संकटाको समिति तामाङले प्रहार आफ्नै पोस्ट्मा परेको थियो । आत्मघाती गोल सहयोगमा उत्साहित देखिएको मनाङले लगत्तै दोस्रो गोल गरेको थियो । अञ्जनले संकटाका गोलरक्षक विनय श्रेष्ठलाई वान भर्सेस वानको अग्रस्थानमा छक्याउँदै गोल गरेका थिए । सुरुआती ४० मिनेट अब्बल प्रदर्शन गरेको संकटाले पहिलो हाफमा दुईवटा उत्कृष्ट मौका गुमाएको थियो ।

आत्मघाती गोलपछि अत्तालिएको संकटाले दोस्रो हाफमा पनि फितला दुईवटा मौका बनाए पनि गोल फर्काउन सकेन । ५३औं मिनेटमा लक्ष्मण रुचालले डीबक्स छेउको फ्रिकिक मिस गरेका थिए । मनाङले दोस्रो हाफमा थप सशक्त प्रदर्शन ग¥यो । ७१औं मिनेटमा निशान लिम्बूले पोस्ट् नजिकबाट उत्कृष्ट गोल गर्दै मनाङलाई सजिलै जिताए । मनाङका अञ्जन विष्ट म्यान अफ दी म्याच भए । जितसँगै मनाङ तेस्रो स्थानमा छ । मनाङले नौ खेलबाट १९ अंक बनाएको छ । दोस्रो स्थानमा रहेको मच्छिन्द्रको पनि समान १९ अंक छ । शीर्ष स्थानमा रहेको त्रिभुवन आर्मी क्लबको २० अंक छ । मनाङसँग हारपछि १२ अंक बनाएको संकटा आठौं स्थानमा छ ।