काठमाडौं : सुदूरपश्चिम रोयल्स नेपाल प्रिमियर लिग (एनपीएल) मा लगातार तेस्रो पटक फाइनलमा प्रवेश गरेको छ । कीर्तिपुरस्थित त्रिवि मैदानमा बिहीबार भएको दोस्रो क्वालिफायरमा चितवन राइनोजलाई तीन विकेटले पराजित गर्दै सुदूरपश्चिमले लगातार तेस्रो पटक फाइनलमा स्थान बनाएको हो । यसअघि दुई पटक फाइनलमा पुगेर पनि सुदूरपश्चिमले उपाधि भने जित्न सकेको छैन ।
चितवनले दिएको एक सय ३४ रनको लक्ष्य सुदूरपश्चिमले १९.५ ओभरमा सात विकेट गुमाएर पूरा गरेको थियो । सुदूरपश्चिमलाई जित दिलाउन थरिन्दु रत्नायकेले संयमित ब्याटिङ गरेका थिए । उनले अविजित ५३ रनको पालि खेलेका थिए । यस्तै विनोद भण्डारीले २३, कप्तान दीपेन्द्रसिंह ऐरीले १५ तथा इशान पाण्डे र आरिफ शेखले समान १० रन जोडेका थिए । चितवनका रञ्जित कुमारले दुई तथा रिजन ढकाल, कमलसिंह ऐरी, उसमा मीर र सलाउद्दिन खानले एक÷एक विकेट लिए ।
यसअघि पहिले ब्याटिङ गरेको चितवनले निर्धारित २० ओभरमा नौ विकेटको क्षतिमा एक सय ३३ रनको योगफल खडा गरेको थियो । चितवनका डाविड मालानले अविजित ७१ रनको अर्धशतकीय पालि खेलेका थिए । उनले ५१ बलमा दुई छक्का र नौ चौका हिर्काए । यस्तै सलाउद्दिन खानले १८ र कमलसिंह ऐरीले १० रन जोडेका थिए । सुदूरपश्चिमका स्कट केगुलेइनले तीन विकेट लिए । यस्तै थरिन्दु रत्नायकेले दुई तथा हेमन्त धामी, कप्तान दीपेन्द्रसिंह ऐरी र इशान पाण्डेले एक÷एक विकेट हात पारे ।
सुदूरपश्चिमले अब उपाधिका लागि साविक विजेता लुम्बिनी लायन्ससँग शनिबार प्रतिस्पर्धा गर्नेछ । यसअघि लुम्बिनीसँगको पहिलो क्वालिफायरमा सुदूरपश्चिम ६ विकेटले पराजित भएको थियो । दोस्रो संस्करणको फाइनलमा पनि सुदूरपश्चिम लुम्बिनीसँगै पराजित भएपछि उपविजेतामा सीमित भएको थियो ।
Previous Article
अभिनयमा विस्तारै आत्मविश्वास बढिरहेको छ : परीक्षा लिम्बू
No Newer Articles

नेपालमाला
