नेपालमाला
८ फाल्गुन २०८०, बुधबार 
काठमाडौं : नेपालका अन्तर्राष्ट्रिय तेक्वान्दो निर्णायक नोर्बु लामा र कुमार लामा घिसिङले भारतको नोयडामा अफिसियल रेफ्रीजर्जको भूमिका निर्वाह गरेका छन् । नोयडा तेक्वान्दो संघको आयोजनामा भारतको नयाँ दिल्लीमा सञ्चालन भएको प्रथम प्रधानमन्त्री कप तेक्वान्दो च्याम्पियनसिपमा नोर्बु र कुमारले अफिसियल रेफ्रीजर्जको भूमिका निर्वाह गरेका हुन् ।
ग्रेटर नोयडाको सुरजपुरमा गत आइतबारदेखि तीन दिनसम्म सञ्चालन भएको च्याम्पियनसिपमा दुई अन्तर्राष्ट्रिय रेफ्रीसँगै २० जना खेलाडीले प्रतिस्पर्धा गरेका थिए । जसमा ११ स्वर्ण र नौ रजत पदक जितेको च्याम्पियनसिपका निर्णायक कुमार लामा घिसिङले जानकारी दिए ।
तेक्वान्दोका वरिष्ठ प्रशिक्षकसमेत रहेका नोर्बु ग्योरोगी र पुम्से विधाका अन्तर्राष्ट्रिय रेफ्री हुन् । पुम्सेको उनी सेकेन्ड क्लास अन्तर्राष्ट्रिय रेफ्री हुन् । उनी सन् २०२० मा पुम्सेको सेकेन्ड क्लास अन्तर्राष्ट्रिय रेफ्री बनेका थिए । नोर्बुले हालै विश्व तेक्वान्दो मुख्यालय कुकिवानबाट सातौं डानको परीक्षा पनि उतीर्ण गरेका छन् । काभ्रेको मादनकुडारीका नोर्बुले २०४३ सालमा १३ वर्षको उमेरदेखि तेक्वान्दो खेल्न थालेका हुन् । राष्ट्रिय खेलकुद परिषद्का वरिष्ठ प्रशिक्षकसमेत रहेका उनले २०५० सालदेखि स्युचाटार तेक्वान्दो डोजाङ सञ्चालन गर्दै आएका छन् । स्युचाटार डोजाङले थुप्रै राष्ट्रिय तथा अन्तर्राष्ट्रिय खेलाडी उत्पादन गर्दै आएको छ ।
उनले विभिन्न मुलुकमा भएको अन्तर्राष्ट्रिय रेफ्री रिफ्रेसर कोर्समा सहभागिता जनाउनुका साथै विभिन्न राष्ट्रमा भएका अन्तर्राष्ट्रिय प्रतियोगितामा अफिसियल रेफ्रीजर्जको भूमिका निर्वाह गर्दै आएका छन् ।
यसैगरी विगत तीन दशकदेखि नेपाली खेलकुदमा सक्रिय कुमार नेपाल तेक्वान्दो संघका केन्द्रीय सदस्य एवं जुनियर राष्ट्रिय टिम तयारी उपसमितिका संयोजक पनि हुन् । कुमारले युनाइटेड तेक्वान्दो डोजाङमार्फत राष्ट्रिय तथा अन्तर्राष्ट्रिय खेलाडी उत्पादन गरिरहेका छन् । उनकै पहलमा काठमाडौं अन्तर्राष्ट्रिय ग्योरोगी तथा पुम्से च्याम्पियनसिप पनि आयोजना हुँदै आएको छ । च्याम्पियनसिपको अहिलेसम्म चार संस्करण आयोजना भइसकेको छ ।
२०७९ फागुनमा संयुक्त अरब इमिरेट्स (यूएई) को दुबईमा सञ्चालन भएको अन्तर्राष्ट्रिय ग्योरोगी रेफ्री सेमिनारमा सहभागी कुमारले रेफ्री कोर्स उत्तीर्ण गरेका थिए । उनले पनि विभिन्न मुलुकमा भएका अन्तर्राष्ट्रिय प्रतियोगितामा अफिसियल रेफ्रीजर्जको भूमिका निर्वाह गर्दै आएका छन् ।
