१९औं एसियाली खेलकुद : करातेमा ऐतिहासिक रजत

हाङचाओ (चीन) : चीनको हाङचाओमा जारी १९औं एसियाली खेलकुदमा नेपालले ऐतिहासिक रजत पदक जितेको छ । १९ वर्षीया एरिका गुरूङले करातेमा नेपाललाई ऐतिहासिक रजत पदक दिलाएकी हुन् । हाङचाओस्थित लिनिङ स्पोर्ट्स सेन्टर जिम्न्याजियममा शनिबार भएको महिला ६८ केजीमाथिको तौल समूहको फाइनलमा काजकिस्तानकी सोफ्या बेरुल्तसेभासँग ३–० अंकले पराजित भएपछि एरिका रजत पदकमा रोकिएकी हुन् ।
यसअघि शनिबार नै भएको सेमिफाइनलमा उनले हङकङकी यान काई होलाई ८–४ ले हराउँदै फाइनलमा स्थान बनाएकी थिइन् । क्वार्टरफाइनलमा भने जापानकी खेलाडी एजुकी सबाईलाई सेन्सुको आधारमा हराजित गर्दै सेमिफाइनलमा पुगेकी थिइन् । दुवै खेलाडी समान १–१ अंक जोडेपछि पहिलो अंक पाएको आधारमा एरिकाले सेमिफाइनलमा स्थान बनाएकी थिइन् । एरिकाले नेपालका लागि जारी एसियाली खेलकुदमा दोस्रो पदक जितेकी हुन् । यसअघि नेपालले महिला कबड्डीमा कांस्य पदक जितेको थियो ।

एसियाली खेलकुदको इतिहासमा भने नेपाल नेपालले दोस्रो पटक रजत पदक जितेको हो । सन् १९९८ मा बैंककमा भएको १३औं एसियाली खेलकुदमा तेक्वान्दोकी सविता राजभण्डारीले पहिलो पटक नेपाललाई रजत दिलाएकी थिइन् । यस्तै पछिल्लो पटक सन् २०१८ मा इन्डोनेसियामा भएको १८औं एसियाली खेलकुदमा नेपालले प्याराग्लाइडिङको पुरुष टिम स्पर्धामा रजत पदक जितेको थियो । व्यक्तिगत स्पर्धामा भने एरियाले २५ वर्षपछि नेपाललाई रजत पदक दिलाएकी हुन् । व्यक्तिगत स्पर्धामा रजत पदक जित्ने उनी सविता राजभण्डारीपछि दोस्रो खेलाडी हुन् । करातेमा पहिलो रजत तथा समग्रमा तेस्रो रजत पदक जिताएकी हुन् । एसियाली खेलकुदमा नेपालले लगातार दुई संस्करणमा रजत पदक जितेको छ । एसियाली खेलकुदको ७२ वर्षको इतिहासमा नेपालले लगातार दुई संस्करणमा रजत पदक जितेको यो पहिलो पटक हो ।
यससँगै एसियाली खेलकुदमा नेपालको पदक संख्या २६ पुगेको छ । एसियाली खेलकुदमा नेपालले यसअघि २४ पदक जितेको थियो । जसमा दुई रजत र २२ कांस्य समावेश थिए । नेपालले यसअघि तेक्वान्दोमा १४, बक्सिङमा ६, करातेमा तीन र प्याराग्लाइडिङमा एक पदक जितेको थियो । एसियाली खेलकुदमा करातेले पहिलो पटक रजत पदक जितेको हो । नेपालले एसियाली खेलकुदमा करातेबाट जितेको यो चौथो पदक हो । यसअघि सन् १९९८ मा समरबहादुर गोले र सन् २०१४ मा विमला तामाङले कांस्य पदक जितेका थिए । नेपाली टोलीका सेभ द मिसन राष्ट्रिय खेलकुद परिषद्का सदस्यसचिव टंकलाल घिसिङले एरिकालाई ऐतिहासिक पदक जित्न सफल भएकोमा बधाइ दिदै उनले सिंगो राष्ट्रको शिर उँचो बनाएको बताए ।

‘मेरो पदक देशका लागि’
शनिबार नेपाललाई करातेमा ऐतिहासिक रजत पदक दिलाएकी एरिका गुरुङले आफ्नो पदक राष्ट्रका लागि समर्पण गरेकी छन् । ‘मैले आफ्नो बेस्ट दिएको हो । सोफ्या बेरुल्तसेभा निकै अनुभवी खेलाडी हुन् । उनीसँग मैले राम्रो खेलें । हाम्रो अनुभवको कमीले गर्दा स्वर्णबाट चुक्न पुगें’, उनले भनिन्, ‘यसलाई मैले शिक्षाका रुपमा लिएकी छु । यसले सदैव उर्जा दिइरहने छ । यो पदक देशका लागि समर्पण गर्न चाहन्छु । उनले खेलाडीले राम्रो प्रशिक्षण र ‘एक्सपोजर’ पाउने हो भने आगामी दिनमा उत्कृष्ट नतिजा ल्याउन सकिने बताइन् । ‘देशका लागि पदक जित्दा मैले आफूलाई भाग्यमानी ठानेकी छु । मलाई निकै गर्व लागेको छ । देशका लागि अझै धेरै गर्नुछ । यो एउटा खुड्किलो मात्रै हो’, एरिकाले भनिन्, ‘अबका दिनमा राम्रो प्रशिक्षण र ‘एक्सपोजर’ पाएमा योभन्दा ठूलो प्रतियोगितामा पनि पदक जित्न सकिन्छ ।’
प्रशिक्षक कुशल श्रेष्ठले नेपाललाई ऐतिहासिक पदक दिलाउन पाउँदा निकै खुसी लागेको बताए । ‘यो नेपाली खेलकुदका लागि ऐतिहासिक क्षण हो । विपक्षी खेलाडी निकै अनुभवी हुँदा रजत पदकमा चित्त बुझाउन पुग्यौं । एसियाली खेलकुदजस्तो ठूलो प्रतियोगितामा नेपालले पनि स्वर्ण पदक जित्न सक्छ भन्ने प्रमाणित गरेको छ’, उनले भने । शनिबारै नेपालका सन्तोष श्रेष्ठले पुरुष ६७ केजीमुनि तौल समूहको प्रिक्वार्टरफाइनलमा प्रतिस्पर्धा गरेका थिए । उनी थाइल्यान्डका फियन्डी चाईवाटसँग ३–२ अंकले पराजित भएका थिए ।

एसियाली खेलकुदका पदक विजेता खेलाडी
१०औं संस्करण १९८६ (सोल, दक्षिण कोरिया)
दलबहादुर रानामगर (बक्सिङ) कांस्य
तुलबहादुर थापा (बक्सिङ) कांस्य
सुशील पोखरेल (बक्सिङ) कांस्य
मनोजबहादुर श्रेष्ठ (बक्सिङ) कांस्य
राजकुमार राई (तेक्वान्दो) कांस्य
विधान लामा (तेक्वान्दो) कांस्य
रामबहादुर घर्ती (तेक्वान्दो) कांस्य
राजकुमार बुढाथोकी (तेक्वान्दो) कांस्य
११औं संस्करण १९९० (बेइजिङ, चीन)
चित्रबहादुर गुरुङ (बक्सिङ) कांस्य
१२औं संस्करण १९९४ (हिरोसिमा, जापान) मानबहादुर शाही (तेक्वान्दो) कांस्य
सीता राई (कराते) कांस्य
१३औं संस्करण १९९८ (बैंकक, थाइल्यान्ड)
सविता राजभण्डारी (तेक्वान्दो) रजत
किशोर श्रेष्ठ (तेक्वान्दो) कांस्य
सपना मल्ल (तेक्वान्दो) कांस्य
समरबहादुर गोले (कराते) कांस्य
१४औं संस्करण २००२ (बुसान, दक्षिण कोरिया)
दीपक विष्ट (तेक्वान्दो) कांस्य
रेनुका रानामगर (तेक्वान्दो) कांस्य
ऋतु जिमी राई (तेक्वान्दो) कांस्य
१५औं संस्करण २००६ (दोहा, कतार)
दीपक विष्ट (तेक्वान्दो) कांस्य
आयशा शाक्य (तेक्वान्दो) कांस्य
मनिता शाही (तेक्वान्दो) कांस्य
१६औं संस्करण २०१० (ग्वाङ्झाव, चीन)
दीपक महर्जन (बक्सिङ) कांस्य
१७औं संस्करण २०१४ (इन्चोन, दक्षिण कोरिया)
विमला तामाङ (कराते) कांस्य
१८औं संस्करण २०१८ (जाकार्ता, इन्डोनेसिया)
पुरुष टिम (प्याराग्लाइडिङ) रजत
१९औं संस्करण २०२३ हाङचाओ (चीन)
महिला टिम (कबड्डी) कांस्य
एरिका गुरुङ (कराते) रजत